«Aqbıkesh» munarasy respýblıkalyq mártebesin saqtap qalady- mınıstrlik ókili
TÚRKІSTAN. KAZINFORM- Arnaıy qurylǵan komıssııa músheleri Sozaq aýdanyndaǵy «Aqbıkesh» munarasyna bardy.
QR Mádenıet jáne aqparat mınıstrliginiń tarıhı-mádenı mura basqarmasynyń basshysy Janat Seıdalıevanyń aıtýynsha, aldaǵy ýaqytta munaraǵa konservatsııalyq jumystar júrgiziledi.
– Eń mańyzdysy – buzylǵan munaranyń ózi emes, qaıta qalpyna keltirý kezinde qoldanylǵan materıaldar. Qazirgi tańda tarıhı kórinisin saqtap tur. Eger qaıta qalpyna keltirý týraly sheshim qabyldansa, ǵylymı-restavratsııalyq jumystar tıisti lıtsenzııasy, biliktiligi jáne tájirıbesi bar uıymmen oryndalady. QR Zańnamasyna sáıkes, eskertkish tek tolyq fızıkalyq joıylǵan jaǵdaıda ǵana tarıhı-mádenı qundylyq mártebesinen aıyrylady. Osyǵan baılanysty, «Aqbıkesh» munarasy respýblıkalyq mańyzy bar tarıh jáne mádenıet eskertkishi mártebesin saqtap qalady, – dedi Janat Seıdalyqyzy.
Al, «Qazqaıtajańartý» RMK dırektory Almas Abdıevtiń sózine súıensek, tarıhı eskertkishti jóndeý jumystary aldyn ala daıyndalǵan ǵylymı-jobalyq qujattamaǵa sáıkes oryndalǵan. Soǵan saı sapaly materıaldar paıdalanylǵan.
- 2020 jylǵa deıin munaranyń saqtalý deńgeıi 5-6 metr bıiktikte bolǵan. Ǵylymı-restavratsııalyq jumystar kúnniń sýyǵynda júrgizilgendikten, aýa raıynyń qolaısyzdyǵy jańa jáne burynǵy materıaldardyń birigý protsesine keri áserin tıgizdi. Qaıta qalpyna keltirý jumystary (rekonstrýktsııa) boıynsha sheshim mamandardyń pikirin eskere otyryp qabyldanady, – dedi Almas Abdıev.
Aıta keteıik, tarıhı nysan Aqsúmbe aýylynan batysqa qaraı 1 shaqyrym jerde bıik jota basynda ornalasqan. 2019 jyly respýblıkalyq mańyzy bar tarıh jáne mádenıet eskertkishteriniń tizimine engizilgen. Munaraǵa 2020 jyly alǵash ret respýblıkalyq bıýdjet esebinen QR Mádenıet jáne sport mınıstrliginiń tapsyrysymen «Qazqaıtajańartý» RMK-si tarapynan ǵylymı-restavratsııalyq jumystar júrgizilgen.
Eske salaıyq, budan buryn opyrylǵan Aqbıkesh munarasyn tekseretin jumys toby qurylǵanyn jazǵan bolatynbyz.
