Aqberen Elgezek Qorǵanys jáne aeroǵarysh mınıstriniń baspasóz xatshysy bolyp taǵaıyndaldy

ASTANA. QazAqparat - Belgili aqyn ári jýrnalıst Aqberen Elgezek mınıstrliktiń baspasóz qyzmetin basqarady. Bul týraly ol Feısbýktegi paraqshasynda jazdy.

«Qadirli aǵaıyn! Elordaǵa oraldyq. Qazaqstan Respýblıkasynyń Qorǵanys jáne aeroǵarysh mınıstriniń baspasóz xatshysy laýazymyna taǵaıyndaldyq. Jýrnalıst áriptesterime qoldan kelgen kómegimdi kórsetýge daıarmyn», delingen jazbada.

Aqberen Elgezek 1980 jyly Almaty qalasynda dúnıege kelgen. Semeı oblysy Shubartaý aýdany, Mádenıet aýylynyń E.Rahmadıev atyndaǵy orta mektepti bitirgen.
Ál-Farabı atyndaǵy QazMUÝ tarıh fakýltetiniń túlegi.
Qazaqstan Jazýshylar Odaǵynyń múshesi, Memlekettik «Daryn» jastar syılyǵynyń ıegeri.