Atyraýdaǵy otbasynyń ólimi: Aqbaıan Muqanǵalıevanyń balalarymen qaýyshqan vıdeosy tarady
ATYRAÝ.KAZINFORM - Atyraý oblysynda bútin bir otbasynyń ólimine sebep bolǵan Sultan Sarsemalıevtiń áıeli Aqbaıan Muqanǵalıevanyń balalarymen kezdesken kezde túsirilgen vıdeo tarady.
Áleýmettik jelide jarııalanǵan vıdeodan Aqbaıan Muqanǵalıevanyń jasóspirimderdi beıimdeý ortalyǵynda turyp jatqan balalarymen saǵyna qaýyshqan sátin baıqaýǵa bolady.
Aqbaıan Muqanǵalıevanyń tamyz aıynda psıhıkalyq densaýlyq ortalyǵynan shyqqanyn, sodan keıin balalarymen kezdeskenin jazǵan edik.
Qazir Aqbaıan týystarynyń qaraýynda. Balalarymen aralasýy onyń emotsıonaldyq jaǵdaıyna oń áser etip, psıhologııalyq turǵydan qalpyna kelýine sep bolýy múmkin.
Týystary onyń emdelýi men ońalýyna qajetti jaǵdaı jasap jatyr. Olar Aqbaıannyń birtindep tolyqtaı qalpyna kelip, balalarymen birge qalypty ómirge oralatynynan úmitti.
Eske salaıyq, qyrkúıek aıynyń basynda Sultan Sarsemalıevti ómir boıyna bas bostandyǵynan aıyrý týraly úkim kúshine endi. Ata-enesi men áıeliniń baýyrlaryn óltirgen sottalýshy apellıatsııalyq shaǵym jazǵan joq.
