Aqbastydaǵy «altyn» qudyqtyń qupııasyn kim ashady – Qyzylorda oblysy
Aqbasty aýdan ortalyǵynan shalǵaıda oryn tepken. Shamamen – 300 shaqyrymǵa jýyq. Bul aýmaqta qanshama tarıhı oryndar bar. Solardyń biri retinde Manabaı baz degen oryndy aıtýǵa ábden bolady. Eskiden jetken áńgime boıynsha atalmysh aýmaqta Manabaı esimdi baı ómir súrgen kórinedi. Shóldi aımaqta ornalasqan jerde qoldaǵy tórt túlikke sý taýyp berýdiń ózi ońaıǵa soqpaǵan kórinedi. Manabaıdyń órisi malǵa lyq toly bolǵan. Olardyń basym kópshiligi túlik tóresi – jylqy bolǵanǵa uqsaıdy.
Sol bir kezeńde ataqty baı kesene saldyrady. Sý tapshylyǵy bolǵandyqtan, onyń kirpishi jylqy sútine ılengen desedi kónekózder. Sol keseneniń eń bıik núktesi tańǵy kún shýaǵymen kóleńke bop túsken jerine qudyq qazdyrǵan eken. Qazylǵan qudyq halyqtyń kádesine jarap, ol biraz jyldar boıy elge qyzmet etken.
Odan bergi jyldarda qanshama ýaqyt ótti. Kóne kesene de tabıǵat qubylysyna shydas bermedi. Qudyqtan da sý shyqpaıtyn boldy. Dese de, el aýzynda sol qudyqqa qatysty áńgimeler áli kúnge deıin aıtylady.
Aqbasty aýylyndaǵy №22 orta mekteptiń áleýmettik pedagogy J. Qalybaev bul jóninde bylaısha syr shertedi. «Bala kezimizde Manabaı bazaǵa jıi barýshy edik. Sonda bıiktigi 3-4 metr kúmbezi bar kesene kózimizge jıi shalynatyn. Asty beton bolatyn. Ókinishtisi, beride tarıhı muralarǵa kóńil bólinbeı ketti emes pe? Kesene daýyl men jaýynǵa shydas bere alǵan joq. Qazir ol oryn tek tómpeshik bolyp jatyr. Manabaıdyń qazdyrǵan qudyǵy da kómilip qaldy. Bir derekterde onda altyn-kúmis sekildi asyl tastar kómilgeni aıtylady. 1970 jyldary kesene aımaǵy traktormen qazdyrylǵan. Degenmen, qolǵa eshteńe ilikken joq. Sol aýmaqtan naızanyń ushy, temir kisender syndy tot basqan eski dúnıeler shyqqan. Mundaı izdestirý jumystary sekseninshi jyldardyń bederinde taǵy bir márte jasaldy. Ol da nátıjesiz aıaqtaldy», - deıdi ol.
Úsh jyldaı buryn Aqtóbe aımaǵynan Manabaıdyń urpaǵymyz dep kelgen adamdar toby sol aýmaqta izdestirý júrgizdi. Bul joly da qolǵa eshteńe túse qoıǵan joq. Osylaısha, qudyq ishindegi altyn-kúmis týraly derektiń ras-ótirigi osy kúnge deıin belgisiz qalyp otyr.
