Aqaýlar azaıyp, júıe turaqtandy: jylytý maýsymynyń qorytyndysy shyqty
ASTANA. KAZINFORM — Búgin Energetıka mınıstrliginiń Memlekettik energetıkalyq qadaǵalaý jáne baqylaý komıtetinde 2025–2026 jyldardaǵy jylytý maýsymynyń qorytyndysy boıynsha respýblıkalyq selektorlyq keńes ótti. Bul týraly vedomsvonyń baspasóz qyzmeti málim etti.
Іs-sharaǵa «KEGOC», «Samuryq-Energo», «TsAEK», «Qazaqstandyq kommýnaldyq júıeler», Eýrazııalyq top, «QazMunaıGaz», «QazaqGaz Aimaq», «QTJ» basshylary, sondaı-aq beınekonferentsbaılanys arqyly ákimdikterdiń, aýmaqtyq departamentter jáne energııa kásiporyndarynyń basshylyǵy qatysty.
— Jylytý maýsymy shtattyq rejımde ótip, tutynýshylardy turaqty jylýmen qamtamasyz etý qamtamasyz etildi. Komıtet tóraǵasy Erjan Ertaev oń dınamıkany atap ótti: elektr stantsııalaryndaǵy tehnologııalyq buzýshylyqtar sany 15%-ǵa tómendedi, al temperatýralyq kesteniń saqtalmaý jaǵdaılary úsh esege qysqardy, — delingen habarlamada.
Aldaǵy jylytý maýsymyna daıyndyq aıasynda aýqymdy jóndeý naýqany bastaldy. Elektr stantsııalarynda 9 energııa blogyn, 55 qazandyqty jáne 51 týrbınany kúrdeli jóndeý josparlanǵan. Búginde 4 energııa blogynda, 18 qazandyqta jáne 7 týrbınada jumystar júrgizilýde, 1 qazandyq pen 1 týrbınany jóndeý belgilengen merzimde aıaqtaldy.
Sondaı-aq bıyl jalpy uzyndyǵy 17 098 km elektr berý jelilerine, 444 qosalqy stantsııaǵa, sondaı-aq 3 408 taratý pýnktteri men transformatorlyq qosalqy stantsııalarǵa kúrdeli jóndeý júrgizilýde. Atalǵan sharalardy iske asyrý elektr jelileriniń ortasha tozý deńgeıin 65,67%-ǵa deıin tómendetýge múmkindik beredi.
El boıynsha jylý jelilerinde 377 km kúrdeli jóndeý jáne qaıta jańǵyrtý josparlanǵan. Onyń ishinde energetıka sektoryn jańǵyrtý jónindegi Ulttyq joba aıasynda 2026 jylǵa 130 km jylý jelilerin qaıta jańǵyrtý kózdelgen. Jalpy keshendi jumys jylý jelileriniń ortasha tozý deńgeıin 48%-ǵa deıin tómendetýge múmkindik beredi.
Keńes qorytyndysy boıynsha energııa kásiporyndaryna konkýrstyq rásimderdi jedeldetý jáne jóndeý jumystaryna shuǵyl kirisý, sondaı-aq gıdravlıkalyq synaqtar kestesin qatań saqtaý jáne anyqtalǵan aqaýlardy der kezinde joıý tapsyryldy.
— Aldymyzdaǵy qystyń qalypty deńgeıde ótýin qamtamasyz etý qajet. Daıyndyq aıasynda júrgiziletin jóndeý naýqany — mańyzdy ári sheshýshi kezeń. Bizdiń mindetimiz — barlyq josparlanǵan jumystardy tolyq, sapaly jáne ýaqytyly oryndaý, halyqty jylýmen turaqty qamtamasyz etý, — dep atap ótti Komıtet tóraǵasy.
Aıta keteıik, buǵan deıin energetıka kásiporyndarynyń qyzmetkerlerine jeńildetilgen ıpoteka beriletinin jazǵan edik.
