Aqaýy bar jańa kólikti qaıtaryp berýge kedergi keltiretin norma joıylady

ASTANA. KAZINFORM – Zaýyttan aqaýy bar jańa kólikti avtosalonǵa qaıtaryp berýge kedergi keltiretin zań normasy joıylady. Bul týraly QR SIM Tutynýshylardyń quqyqtaryn qorǵaý komıteti tóraǵasynyń orynbasary Serik Qusaıynov aıtty.

– 2021 jyldyń sońynda Ónerkásiptik saıasat týraly zańdy qabyldaý kezinde depýtattar bizdiń zańǵa ózgeris engizý bastamasyn kóterdi. Ol zańǵa Ónerkásip mınıstrligi jaýapty boldy. Osy zań jobasyn qabyldaý kezinde «Tehnıkalyq turǵyda kúrdeli taýar» uǵymy jáne oǵan qatysty norma engizildi. Avtomobıl, kater, traktor sekildi tehnıkalarǵa tutynýshy quqyǵyn qorǵaýdyń jalpy normalary júrmeıtin boldy. Qoǵam ondaı normaǵa qarsy ekenin bildirdi. Endi qazir Májiliste qaralyp jatqan zań jobasynda osy norma qaıtadan alynyp tastaldy. Qoǵamdyq birlestikter ókilderi ondaı normanyń qaıtadan enip ketpeýin jiti qadaǵalaıtyn bolady, - dedi ol «Tutynýshylardyń quqyqtaryn qorǵaý: bıznes, memleket jáne qoǵam dıalogy» atty forýmda.

Spıker jańa kólikterge qatysty shaǵymnyń kóp ekenin aıtty.

– Bir mysal keltireıik, áıel adam Zeekr avtokóligin satyp alǵan. Odan keıin aqaý anyqtalǵan. Sonda da avtosalon keıin onyń quqyǵyn qalpyna keltirýge asyqpaı, anda-mynda júgirte bergen. Osydan soń tutynýshy bizge shaǵymdandy. Biz qoldanystaǵy zańnan tıisti normany taýyp, onyń quqyǵyn qorǵaı aldyq, - dep túıdi sózin Serik Qusaıynov.

Eske sala ketsek, elimizde 2023 jyldyń qyrkúıeginen beri Tutynýshylardyń quqyǵyn qorǵaý týraly jańa zań jobasy qaralyp jatyr. Qazir ol Májilistiń qaraýynda.

Jańa zań qabyldanǵan soń tutynýshy 4 satyly shaǵymdaný kezeńderinen ótpesten, birden sotqa júgine alatyn bolady. 

Tutynýshylar quqyǵyn qorǵaý ombýdsmeni ınstıtýty qurylady.

Elektrondyq saýda salasynda da ózgeris bolady.

Áýe tasymaly salasynda bılet qunyn qaıtaryp alý múmkindigin beretin norma da engizilýi múmkin.