Aqaý úshin aqsha alynbaıtyn aqyly joldardyń tizimi jeltoqsanǵa qaraı jarııalanady

ASTANA. KAZINFORM – «QazAvtoJol» ulttyq kompanııasy» aktsıonerlik qoǵamynyń basqarma tóraǵasy Darhan Imanashev aqaýy bar aqyly joldardan aqsha almaý týraly bastamanyń qalaı oryndalyp jatqanyn aıtty.

- Jolaýshylardyń shaǵymynan keıin biz osyndaı bastama kóterip, ókiletti organ (Kólik mınıstrligi – red.) ony quptaǵan. Osylaısha qyrkúıekte tıisti buıryq shyqty. Osy buıryq tolyq kúshine ený úshin birqatar protsedýra jasalý kerek. Qazir múddeli memlekettik organdar men uıymdardyń ókilderinen qurylǵan arnaıy komıssııa árbir aqyly ýchaskeni qarap, tekserip jatyr. Qarap bolǵannan keıin tıisti akt jazady. Ol aktilerdi bizge beredi. Biz qujattardy qarap, Kólik mınıstrligine iriktep , Mınıstrlik sol qujattar negizinde buıryqqa aqyly joldyń aqaýy bar bóligimen júrgeni úshin aqsha alynbaıtyny týraly túzetý engizedi, - dedi ol ortalyq kommýnıkatsııalar qyzmetinde ótken baspasóz máslıhatynda.

Joldaǵy aqaý tolyq joıylǵannan keıin jol qaıtadan tolyqtaı aqyly bolady.

- Qarapaıym tilmen aıtsaq, arnaıy komıssııa 100 shaqyrym aqyly joldyń 10 shaqyrymy normatıvke saı emes ekenin anyqtasa, buıryqta osy 10 shaqyrym bólikti aqyly jol sanatynan alyp tastaý týraly ózgeris engizemiz Qalǵan 90 shaqyrymynan ǵana aqy alynady. Biraq aqaýlar joıylǵannan keıin álgi 10 shaqyrym bólikti qaıtadan aqyly etý quqyǵy ózimizde qalady. 10 qarashaǵa deıin komıssııa búkil aqyly joldardy aralap, qorytyndy berý kerek. 25-30 qarashaǵa qaraı Kólik mınıstrligi buıryq shyǵaryp, óz kommýnıkatsııa arnalarymyz arqyly ondaı ýchaskeler týraly málimet beremiz dep oılaımyn. Árbir aqyly jol paıdalanýshynyń jeke kabınetine aqaýy bar bólik úshin alynǵan tólem shegerilgeni týraly málimet joldanady, - dedi Darhan Imanashev.

Aıta ketý kerek, bıylǵy 9 aıda eldegi 26 aqyly joldan bıýdjetke 62 mlrd teńge túsken.