Aqaý shyqqan sý qubyry «Ekibastuz qalalyq sý arnasyna» tıesili

«PAVLODAR. KAZINFORM – Maıqaıyń kenti men «Bogatyr-Kómir» AQ-na sý jetkizetin magıstraldi qubyr «Ekibastuz qalalyq sý arnasyna» tıesili. Al kent ishindegi sý qubyrlaryna «Maıqaıyńaltyn» AQ jaýap beredi. 

Altyn kenishin jaǵalaı ornalasqan Maıqaıyń kentinde ortalyqtandyrylǵan aýyzsýdy tutynatyn 2500 jeke abonent bar. 

Bul týraly «Maıqaıyńaltyn» AQ bas dırektory Qýanysh Botın habarlady.

– Maıqaıyń kenti boıynsha shamamen 2500-deı jeke tutynýshy bar. Al kent ishindegi sý qubyrlary bizdiń kásiporynǵa senimgerlik basqarýǵa berilgen. Ekibastuz sý arnasynan Maıqaıyńǵa deıin júrgizilgen úlken qubyry «Bogatyr-Kómir» kásipornyn basyp, odan soń Maıqaıyńǵa keledi. «Bogatyr-Kómir» kenishinen beri qaraı 30 km. Al aqaýdyń ózi «Bogatyr-Kómir» kenishiniń ar jaǵynda, sý arnasynan 27 shaqyrym jerde oryn alǵan, - deıdi A.Botın.

Belgili bolǵandaı, aqaý shyqqan dıametri 1020 mm-lik sý qubyry «Ekibastuz qalalyq sý arnasy» memlekettik kommýnaldyq kásipornyna tıesili.

Eske sala keteıik, Ekibastuzdan Maıqaıyń kentine aýyzsý jetkizetin úlken qubyr jaryldy.

Maıqaıyń kentiniń turǵyndary kúnine 1 myń tekshe metr aýyzsý tutynyp kelgen. Qazir qysymnyń tómendeýine baılanysty «Maıqaıyńaltyn» AQ sý tasıtyn mashınalardy jumyldyrdy.

Búginde Maıqaıyń kentinde 10 myńǵa jýyq halyq turady.

Qubyrdaǵy aqaýǵa baılanysty «Bogatyr-Kómir» kásipornyna sý berý ýaqytsha toqtatyldy .