«Aqan seri-Aqtoqty» 21 jyldan soń qaıta oralmaq
ASTANA. 28 maýsym. QazAqparat - Q.Qýanyshbaev atyndaǵy Memlekettik Akademııalyq qazaq mýzykalyq drama teatry Qala kúni qurmetine shildeniń 2-3 kúnderi, saǵat 18.30-da halqynyń birtýar uly Ǵabıt Músirepovtiń «Aqan seri-Aqtoqty» tragedııasynyń
premerasyn ótkizedi. Bul týraly teatrdyń baspasóz qyzmeti habarlaıdy.
Nurlan Jumanııazovtyń sahnalaýynda kórermen nazaryna usynylǵaly otyrǵan bul qoıylym alǵash ret 1942 jyly M.Goldblattyń rejısserlyǵymen qoıylsa, Qallekı teatrynyń shymyldyǵy da 1991 jyly atalmysh qoıylymmen ashylǵan bolatyn. San jyldar boıy sahna tórinen túspeı kele jatqan shyǵarma, talaı teatrdyń mártebesin asqaqtatyp, mereıin ústem etti.
Buǵan deıin teatr sahnasynda birneshe qoıylymdy sahnalaǵan «Eren eńbegi úshin» medaliniń ıegeri, rejısser Nurlan Jumanııazov, Qazaqstan Respýblıkasynyń halyq qaharmany Ázirbaıjan Mámbetovtyń shaqyrtýymen osy óner ordasynda 2000 jyldan beri rejısser qyzmetin atqaryp keledi.
21 jyldan keıin Qallekı sahnasyna qaıta oralǵan shyǵarmada zaman zary, dúmshe moldanyń el arasyn iritken aramza qýlyǵy, seriniń sergeldeńge túsken ahýaly, arýdyń talqyǵa túsken taǵdyry baıandalmaq.
