Aqan Sataevtyń «Bıznesmender» fılminiń álemdik premerasy keıinge shegerildi
ALMATY. QazAqparat - Almaty film festival kınofestıvaliniń uıymdastyrýshylary jabylý saltanatynyń baǵdarlamasyn azdap ózgertti, dep habarlaıdy QazAqparat tilshisi.
19 qyrkúıek kúni keshke Respýblıka saraıynda alǵashqy Almaty film festival saltanatty túrde aıaqtalady. Negizgi baǵdarlamanyń jeńimpazdary anyqtalyp, saraptama komıssııasy pıtchıng nátıjesi boıynsha (bas júlde - ony júzege asyrýǵa qarjylandyrý) úzdik dep tanyǵan kınjoba atalady. Budan bólek, osy jerde «Tulpar» ulttyq syılyǵynyń ıegeri belgili bolady.
Buǵan qosa, Álemdik premerasy Almaty film festival-diń jabylý saltanatynda josparlanǵan Aqan Sataevtyń «Bıznesmender» atty fılmi kórsetilmeıdi.
«Jabylý saltanatynda kınofestıval basty konkýrsynda jeńimpaz dep tanylǵan fılmdi kórsetý týraly sheshim qabyldadyq. Ony 19 qyrkúıekte Almatydaǵy Respýblıka saraıynyń sahnasynda ótetin jabylý saltanatynda jarııalaıdy», - dep málimdedi Almaty Film Festival I Halyqaralyq kınofestıvaliniń prezıdenti Aqan Sataev.
Eske salaıyq, Almaty Film Festival ońtústik astanada alǵash ret uıymdastyrylyp otyr. Basty konkýrsta taıaý jáne alys shetelderden 10 kınokartına usynylǵan.
