Aqan Sataev «Tomırıs» fılmi túsirilip bitkenin aıtty
ASTANA. QazAqparat - Tanymal kınorejısser Aqan Sataev «Tomırıs» kórkem fılmi túsiriliminiń aıaqtalǵanyn jarııa etti, dep habarlaıdy QazAqparat tilshisi.
«Dostar, biz «Tomırıs» fılminiń túsirilimin aıaqtadyq. Osyndaı tamasha oqıǵany túsirý - men úshin úlken abyroı. Sondaı-aq, kórermenniń aldynda úlken jaýapkershilik bar ekenin de bilemin... Bizder - men jáne meniń komandam, barlyq akterler bar kúsh-jigerimizdi salyp, úlken mahabbatpen jumys istedik! Túsirilim tobyn, barlyq akterlerdi, kómektesip, qoldaý kórsetken jandardy quttyqtaımyn jáne alǵys aıtamyn», - dep jazdy Aqan Sataev Feısbýktegi paraqshasyna.
Rejısser atap ótkendeı, bul jobanyń orny erekshe.
«Ár fılm maǵan qymbat!», - dep túıindedi A.Sataev.
Saq patshaıymy jaıyndaǵy «Tomırıs» aýqymdy tarıhı jobasy 2017 jyldyń sáýirinde bastalǵan edi. Fılmdi QR Mádenıet jáne sport mınıstrliginiń tapsyrysymen Sháken Aımanov atyndaǵy «Qazaqfılm» AQ «Sataıfılm» kınokompanııasy túsirdi. Bas prodıýser - Álııa Nazarbaeva («Anaǵa aparar jol»). Fılmniń qoıýshy rejısseri - Aqan Sataev («Reketır», «Adasqan», «Lıkvıdator», «Jaýjúrek myń bala», «Anaǵa aparar jol»).
Kartına bizdiń dáýirimizge deıingi VI ǵasyrdaǵy oqıǵalar jaıynda syr shertedi. Ol kezeńde saq taıpalary uly dalany jaýlap alýǵa kelgen parsy patshasy ІІ Kırge oısyrata toıtarys beredi. Saq áskeriniń qolbasshysy, massagetterdiń patshaıymy Tumar (Tomırıs) boldy.
«Bul shaıqas, menińshe, halyqtar arasyndaǵy eń surapyl soǵys boldy», - dep jazdy ejelgi grek tarıhshysy Gerodot. Fılm stsenarııin ázirlegen kezde onyń eńbekteri de paıdalanyldy.
