Aqan Sataev boksshy Serik Sápıevtiń rólin oınaıtyn akter izdep jatyr
ASTANA. QazAqparat - Qazaqstandyq tanymal rejısser Aqan Sataev óziniń kezekti fılmine kastıng jarııalady, dep habarlaıdy QazAqparat.
Rejısserdiń jańa týyndysy qazaqstandyq boksshy, Olımpıada chempıony Serik Sápıevtiń ómirine arnalmaq.
«Sataıfılm» kompanııasy «Boksshy» fılmine kastıng jarııalaıdy. Basty rólge Serik Sápıevke uqsaıtyn 18-29 jas aralyǵyndaǵy jigit izdeımiz. Bokstasý jáne akterlik qabiletteri bolsa, quptalady», - dep jazdy Aqan Sataev Instagramdaǵy paraqshasyna.
Sondaı-aq, qosalqy rólderge 10-29 jas aralyǵyndaǵy bokspen aınalysatyn balalar men erler qajet. Ultqa qatysty shekteý joq.
Fotosýret pen barlyq málimetti casting_satai@mail.ru poshtasyna jiberý kerek.
Aqan Sataev - Qazaqstandaǵy tabysty rejısserlerdiń biri. Ol sondaı-aq, akter, stsenarıst jáne prodıýser retinde de belgili. Qaraǵandy qalasynyń týmasy. 1994 jyly T.Júrgenov atyndaǵy Qazaq ulttyq óner akademııasynyń kıno jáne televıdenıe fakýltetin bitirgen.
«Reketır», «Adasqandar», «Jaýjúrek myń bala», «Haker», «Ol» jáne «Tomırıs» sekildi tanymal fılmderdi túsirgen. Al jaqynda Nursultan Nazarbaev týraly «Elbasy» kınoepopeıasynyń «Astana» atty besinshi bólimin aıaqtap, ony Memleket basshysy tamashalaǵan bolatyn.
