Akademııalyq bilimi bar ofıtserler QR ÁQ ofıtserlik korpýsyn tolyqtyrdy (FOTO)
«Ofıtser myrzalar, búgin senderdi eldiń Tuńǵysh Prezıdenti atyndaǵy Ulttyq ýnıversıtetti oıdaǵydaı aıaqtaýlaryńmen quttyqtaımyn! Bul sizder úshin de, ásirese elimiz úshin erekshe sát ekeni sózsiz. Sizder áskerı oqý orny tabaldyryǵynan zamanaýı sapaly bilim alǵan alǵashqy ofıtsersiz Úzdik ofıtser retinde tanylǵan soń da osy jerge jiberilgen edińizder.
Ofıtserlik shenmen qosa, áskerı salada tereń bilimderińiz bar. Jaýyngerlik rýh pen joǵary parasattylyqty boılaryna sińirgen qabiletti ásker bolyp qalyptastyńdar», - dedi áskerı qyzmetshilerdi quttyqtaý sózinde QR Qorǵanys mınıstri Imanǵalı Tasmaǵambetov. Búginde JOO-dan keıingi bilim áskerı mamandardy daıarlaýda mańyzdy orynǵa ıe. Ol áskerı ekonomıka, áskerı óndiris, áskerı ǵylymdy jetildirý, jańa tehnologııalardy damytý máselelerin sheshýge qabiletti jańa formatsııadaǵy áskerı-ǵylymı, ǵylymı-pedagogıkalyq mamandardy daıarlaýdyń tıimdi júıesin qamtamasyz etedi. «Búgingi kún ózim úshin erekshe qýanyshty, aıtýly kún. Men kadrlyq áskermin, bul ekinshi áskerı bilimim, áskerı mansabymnyń logıkalyq jalǵasy. Bilim alý arqyly oı-órisimdi keńeıtip, bazalyq irgeli bilimimdi nyǵaıttym. Bul jerdiń aýqymy keń, bilim barynsha tereń. Ýnıversıtettiń óz isin jetik meńgergen naǵyz kásibı mamandary - proffesorlyq-oqytýshylyq quramǵa alǵys bildirgim keledi», - dedi JOO túlegi podpolkovnık Oraz Kýchýkov. Professorlyq-oqytýshylyq quram mamandardy daıarlaý júıesin jetildirýge laıyqty úles qosyp keledi, bul QR áskerı bilimin halyqaralyq standarttarǵa jaýap beretin barynsha sapaly deńgeıge kóterýge múmkindik bere otyryp, Qarýly kúshterdi damytýǵa yqpal etedi.
«Biz Amerıkadaǵy Montgomerı (Alabama shtaty) qalasyndaǵy áskerı-áýe akademııasyna barý múmkindigine ıe boldyq. Olardyń daıarlyǵy men bilimin zerdeledik. Bizdi joǵary birlikti maman retinde daıarlaǵan ýnıversıtettiń oqytýshylaryna alǵys bildirgim keledi», - dedi túlek podpolkovnık Talǵat Qalabaev. Bas shtab fakýltetiniń túlekterimen qatar búgin Ulttyq Gvardııa, Shekara qyzmeti jáne Arnaıy daıyndyq fakýltetteriniń ofıtser túlekteri ýnıversıtetti aıaqtaýda. Oqý ornynyń barlyq 18 kafedrasynyń tyńdaýshylary dıplom aldy. Olar Qarýly kúshter men basqa da áskerı quramalardyń qataryn tolyqtyrmaq.