Akademııa ujymy tanymal rejıssermen kezdesti
ASTANA. 10 qyrkúıek. QazAqparat - Qazaqstan Respýblıkasy ІІM Almaty akademııasynda aty alashqa málim «Abaı», «Qosh bol Gúlsary!» jáne t.b. fılmderdiń qoıýshy rejısseri, prodıýsser Ardaq Ámirqulov eki saǵat ýaqytyn tyńdaýshylarmen ótkizdi.
Akademııanyń baspasóz qyzmeti habarlaǵandaı, kezdesý barysynda rejısser óziniń jeke ómiri men shyǵarmashylyǵyna toqtalyp, keıingi týyndylary týraly áńgime qozǵap, kórermender tarapynan qoıylǵan saýaldarǵa jaýap berdi.
Jany qazaq azamat óziniń súıikti isi júırik baptap, at ábzelderi men qazaq ádebıetiniń jaýharlarynyń ómirin zerttegendi unatady. Óner adamy retinde ádebı týyndylar áserinen shyǵarmashylyq shabytynyń oıanyp, boılaı úńilgen keıipkeriniń ómirinen qýat alyp, nátıjesinde dúnıege jańa kıno keledi.
Elbasynyń qoldaýymen elimizde júrgizilip jatqan orasan jumystardyń jetistigine oń baǵa bere otyryp, rejısser jas tyńdaýshylardy Otandy súııýge, oǵan qaltqysyz qyzmet etýge shaqyrdy. Qazaq topyraǵynda dúnıege kelgenimen bilimin Reseı jerinde shyńdap, AQSh asyp shet elderde kóp júretin A.Ámirqulov óziniń ana tili - qazaq tiline degen qurmetin erekshe ystyq yqylaspen aıalaı sóıledi. Ózge tilderdi erkin meńgergen kınoger qazaq tiliniń kıeliligin jasy ulǵaıǵan saıyn sezinetinin jasyrǵan joq. Qany qazaq dep soqqan ardaly azamat bolashaqta ultymyzdyń, elimizdiń abyroıyn dáripteıtin týyndylardy túsirýdi qolǵa alǵanyn, jáne ony kógildir ekrannan úzdiksiz jarııalaý týraly oılarymen bólisti.
Táýliktiń mezgilimen sanasyp júretin jannyń altyn ýaqytyn bólip, akademııaǵa kelip, syr-suhbat bergenine dán rıza bolǵan oqý ornynyń ujymy arnaıy qurmet kórsetip, gúl shoqtaryn usyndy. Kesh sońynda Qazaqstan Respýblıkasy ІІM Almaty akademııasynyń bastyǵy, polıtsııa general-maıory T. Kýlıbaev óziniń kitabyn eskertkish retinde rejısserǵa syıǵa tartty. Akademııanyń klýbyna jınalǵan kópshilik adamzattyń Aıtmatovy atanǵan uly tulǵa, Qyrǵyz eliniń birtýar azamaty Sh. Aıtmatovtyń «Qosh bol, Gúlsary!» povestine túsirilgen rejısser Ardaq Ámirqulovtyń týyndysyn tamashalady.
