Akademııa men agenttik qazaq tilin oqytý ortalyǵyn ashyp jatyr

ASTANA. 4 mamyr. QazAqparat - QR Prezıdenti janyndaǵy Memlekettik basqarý akademııasynda qazaq tilin oqytý ortalyǵy qurylyp jatyr. Bul týraly búgin Astanada ótken «Bir til - bir el - bir taǵdyr» taqyrybyndaǵy «dóńgelek ústelde» akademııanyń «Tilder jáne aýdarma isi» kafedrasynyń professory Nazıgúl Tólenbergenova málim etti.

«Bul úlken bir ortalyq agenttik (QR Memlekettik qyzmet isteri - avt.) pen akademııa arasynda jumys isteıdi. Ol memlekettik ortalyq bolady. Negizgi baǵyty - tildik quzirettilikti arttyrý. Onda Qazaqstannyń kez kelgen azamaty tildik quzirettiligin jetildire alady. Ortalyq birneshe oqytý baǵyty boıynsha qyzmet etpek. Birinshisi - kópshilik aldynda sóıleýge úıretý, ekinshisi - resmı stılde jazýdy damytý. Sondaı-aq biz qazaq tilinde jyldam oqyp, úlken mátinniń ishinen qajetti aqparatty alyp shyǵý máselesin eskeretin bolamyz», - deıdi N. Tólenbergenova.