Akademık Shahmardan Esenovtiń 100 jyldyǵyn UNESCO-nyń mereıtoılyq kúnder tizimine engizý qajet - senator
ASTANA. KAZINFORM – Qazaqstan ǵylymy, ónerkásibi men ekonomıkasynyń damýyna zor úles qosqan akademık Shahmardan Esenovtiń 100 jyldyǵyn UNESCO-nyń mereıtoılyq kúnder tizimine engizý qajet. Búgin Senattyń jalpy otyrysynda Úkimet basshysynyń orynbasary Ermek Kósherbaevtyń atyna saýal boldaǵan senator Altynbek Nuhuly osyndaı bastama kóterdi.
«Memleket basshysy Qasym-Jomart Kemeluly Toqaev: «Qazir – bilim men ǵylymnyń zamany. Bilim men ǵylym Qazaqstan damýynyń qozǵaýshy kúshi bolýǵa tıis» - dep osy eki egiz salanyń el damýyndaǵy mańyzdylyǵyn atap kórsetti», - dedi senator.
Depýtattyń aıtýynsha, ǵalymnyń jetekshiligimen Jetybaı men Ózenniń iri munaı-gaz ken oryndary ashylyp, paıdalanýǵa berildi, tústi metallýrgııanyń strategııalyq nysandary iske qosyldy. Bul eldiń energetıkalyq jáne ekonomıkalyq derbestigin qamtamasyz etýdiń negizine aınaldy. Sondaı-aq akademık Ál-Farabı esimin tarıhı otanyna qaıtarýda mańyzdy ról atqaryp, 200-den astam ǵylymı eńbek jazdy, ulttyq geologııa mektebin qalyptastyryp, birneshe býyn ǵalymdar men ınjenerlerdi tárbıeledi.
Osyǵan baılanysty Altynbek Nuhuly akademıktiń 100 jyldyǵyn UNESCO-nyń mereıtoılyq kúnder tizimine engizýdi, Aqtaýdaǵy ýnıversıtet aldyna eskertkish ornatýdy, eńbekteriniń kóptomdyq jınaǵyn shyǵarýdy, onyń esimin jańa mektep pen kóshe ataýyna berip, onda mýzeı men ǵylymı-aǵartýshylyq ortalyq ashýdy, sondaı-aq akademıktiń ómiri men murasyna arnalǵan halyqaralyq konferentsııalar ótkizýdi usyndy.
Al senator Gennadıı Shıpovskıh onlaın-kazıno jarnamalaıtyn blogerlerge jazany kúsheıtý qajet dep sanaıdy.