Akademık Ó.Joldasbekovtiń eskertkishi boı kóterdi
ATY. 1 naýryz. QazAqparat /Ádilet Musahaev/ - Búgin Ál-Farabı atyndaǵy Qazaq ulttyq ýnıversıtetinde kórnekti ǵalym, akademık Ómirbek Aryslanuly Joldasbekovtiń 80 jyldyq mereıtoıy qarsańynda oǵan arnalǵan eskertkishtiń saltanatty ashylýy boldy.
Saltanatty sharaǵa QR Bilim jáne ǵylym mınıstri Baqytjan Jumaǵulov, Ál-Farabı atyndaǵy QazUÝ-dyń rektory Ǵalymqaıyr Mutanov, ǵylymı qoǵam ókilderi, Ó.Joldasbekovtiń týystary jáne onyń Reseı, Italııa, Germanııa, Ýkraına, Belarýs, Ázirbaıjan, Ózbekstan, Qyrǵyzstan elderindegi áriptesteri qatysty.
Qazaqstandaǵy robottar mehanıkasy, mehanızmder jáne mashınalar teorııasy mektebiniń negizin qalaýshy, akademık kózi tiri bolǵanda búgin 80 jasqa tolar edi. QR Bilim jáne ǵylym mınıstri Baqytjan Jumaǵulov Lomonosov atyndaǵy Máskeý memlekettik ýnıversıtetin támamdaǵanan keıin ǵalymnyń bar ómiri ǵylym, bilimmen baılanysty bolǵandyǵyn aıtyp ótti. «Ol ǵalamdyq deńgeıdegi ǵalym, jaqsy uıymdastyrýshy, eldiń jetekshi JOO-laryn damytýda baǵa jetpes eńbek qaldyrǵan adam. Ol kisi kózi tirisinde-aq ǵylymı jańalyqtar men jańa mamandyqtarǵa ǵylymı ortalyqtar ashýǵa uıytqy boldy. Sonymen qatar ol el táýelsizdigin qurý jyldary memlekettiń zań shyǵarýshylyq qyzmetine óz úlesin qosty», -dedi mınıstr.
«Biz aıtýly oqıǵaǵa qatysýdamyz. Qazaqstannan tysqary aımaqta da tanymal bolǵan ǵalym, uly adamǵa qurmet kórsetýdemiz. Ol ǵylymnyń álemdik deńgeıdegi jaýhary. Ó. Joldasbekovtyń aty ǵalym retinde úlken árippen qalanyp, ǵylymdaǵy myqty uıymdastyrýshylyq qabiletimen jas ǵalymdarǵa úlgi bolyp qalary anyq», -deıdi Halyqaralyq ınjenerlik akademııasynyń vıtse-prezıdenti, Ýkraına ınjenerlik akademııasynyń akademıgi Anatolıı Vasılev.
Al óz kezeginde QR UǴA-nyń prezıdenti Murat Jurynov artynda izdeýshiler, adal shákirtteri bar Ómirbek Aryslanuly shyn máninde baqytty, esh ýaqytta aty óshpeıtin, jarqyn beınesi júrekte máńgi saqtalatyn uly abyz ardager ekendigin aıtty.
Eskertkishti turǵyzý týraly sheshim QR Mádenıet mınıstrligi janyndaǵy eskertkish jáne monýment ornatý Memlekettik komıssııasynda 2010 jyldyń 3 qarashasynda qabyldanǵan.
Ó.Joldasbekovtiń eskertkishine alańqaı onyń óz atymen atalatyn Stýdentter saraıynyń sol jaǵynan óte sátti tańdaldy. Eskertkishtiń tehnıkalyq qujattaryn «QazGor» jobalyq akademııasy daıarlaǵan. Jalpy kólemi: músinniń bıiktigi - 2 metr, eni - 1,3 metr, tuǵyr irgetasy 5 metrden asady. Eskertkishti talantty músinshi Kádirhan Kákimov otandyq granıtten quıǵan. Músinshi Atyraýdaǵy «Sultan Beıbarys», Tarazdaǵy «Ǵashyqtar» eskertkishteriniń avtory.
Eskertkish Ómirbek Aryslanuly shákirtteriniń, áriptesteri men QazUÝ túlekteriniń qarjylaı demeýshiliginiń negizinde turǵyzyldy.
