Akademık Qalyq Abdýllaev ómirden ozdy
NUR-SULTAN. QazAqparat - Qazaqstannyń eńbek sińirgen qoǵam jáne saıası qaıratkeri, akademık Qalyq Abdýllaev ómirden ozdy, dep habarlaıdy QazAqparat tilshisi.
Bul týraly saıasattanýshy Erbol Edilov Telegram-kanalynda jazdy.
«1997-1999 jyldar aralyǵynda Ońtústik Qazaqstan oblysynyń ákimi bolǵan Qalyq Abdýllaev 78 jasynda ómirden ozdy. Týǵan-týystary men jaqyndaryna qazaǵa baılanysty qaıǵyryp kóńil aıtamyz. Imandy bolsyn!», - dep jazdy ol.
Qalyq Abdýllaev 1942 jyly 28 maýsymda Ońtústik Qazaqstan oblysy, Lengir aýdany, Qasqasý aýylynda dúnıege kelgen. 1963 jyly Tashkent polıtehnıkalyq ınstıtýtyn ınjener-elektrık mamandyǵy boıynsha oqyǵan.
1981 jyly «Qurmet Belgisi» ordenimen marapattalǵan. Qalyq Abdýllaev Shymkent qalalyq, Ońtústik Qazaqstan oblystyq Halyq depýtattary keńesiniń, Qazaq KSR Joǵarǵy Keńesiniń depýtaty bolǵan.
Eńbek jolyn «Ońtústikqazenergonyń» aýdandyq basqarmasyndaǵy ınjener qyzmetinen bastaǵan.
1969 jyly Respýblıka energetıka mınıstrliginiń apparatyna jańadan uıymdastyrylǵan dıspetcherlik birlestik basqarmasyna energetıkalyq tártip qyzmetiniń bastyǵy bolyp jiberilgen. 1974 jyly «Ońtústikqazenergo» aımaqtyq basqarmasyna bas ınjener, keıin basqarma bastyǵy qyzmetin atqarǵan.
1982 jyly Qazaq KSR Energetıka mınıstriniń birinshi orynbasary qyzmetine taǵaıyndaldy.
1986-1992 jyldar aralyǵynda Qazaq KSR Mınıstrler Keńesi tóraǵasynyń orynbasary, Respýblıka Memlekettik josparlaý komıtetiniń tóraǵasy, Qazaq KSR Mınıstrler Keńesi tóraǵasynyń birinshi orynbasary, Respýblıka Memlekettik josparlaý komıtetiniń tóraǵasy, Premer-Mınıstrdiń orynbasary - Qazaq KSR Memlekettik ekonomıkalyq komıtetiniń tóraǵasy qyzmetterin atqardy.
Osy jyldary ol QR Premer-Mınıstriniń orynbasary - Sheteldik ınvestıtsııalar jónindegi ulttyq Agenttik tóraǵasy laýazymynda Qazaqstanǵa shetelderden ınvestıtsııalar tartýdyń alǵashqy tájirıbeleriniń negizin qalady.
1992 jyldan 1995 jylǵa deıin Qazaqstandyq isker yntymaqtastyq ortalyǵy «Atakent» aktsıonerlik qoǵamy basqarmasynyń tóraǵasy boldy. 1995 jyly Qalyq Abdýllaevtyń iskerlik mol tájirıbesi eskerilip Respýblıka Prezıdentiniń arnaıy jarlyǵymen qurylǵan TMD elderimen yntymaqtastyq jónindegi Memlekettik komıtettiń tóraǵasy bolyp taǵaıyndaldy.
1996-1997 jyldary QR Prezıdentiniń keńesshisi qyzmetin atqardy.
1997-1999 jyldary Ońtústik Qazaqstan oblysynyń ákimi, al 2000 jyldan beri ózi qurǵan «Atakent» aktsıonerlik qoǵamy Dırektorlar Keńesiniń tóraǵasy bolyp eńbek etti.
