Akademık Qabı Oqaev ómirden ótti
ASTANA. QazAqparat - Narhoz ýnıversıtetiniń negizin qalaǵan qaıratkerlerdiń biri Qabı Oqaev ómirden ótti. Bul týraly atalǵan JOO-nyń saıtynda habarlandy.
Ýnıversıtet baspasóz qyzmeti keltirgen derek boıynsha, Qazaqstannyń eńbek sińirgen qyzmetkeri, Qazaqstan Respýblıkasy Joǵary mektebi ǵylym akademııasynyń akademıgi, ekonomıka ǵylymdarynyń doktory, professor Qabı Oqauly Oqaev 2017 jyldyń 22 jeltoqsanynda ómirden ótken.
Qabı Oqauly óziniń erekshe eńbekqorlyǵy, tereń bilimi, aıryqsha aqyl-parasaty men tamasha uıymdastyrýshylyq qabiletiniń arqasynda bilim men ǵylymnyń ushar shyńynan kórine bildi.
Qazaqstandaǵy alǵashqy ekonomıkalyq joǵary oqý orny - Almaty halyq sharýashylyǵy ınstıtýtynyń (qazirgi Narhoz ýnıversıtetiniń) negizin qalaýshylardyń biri retinde ol jıyrma jyldan astam ýaqyt boıy AHShI-diń josparlaý ekonomıkasy jáne esep ekonomıkasy fakýltetterin basqardy. Otyz jyl boıyna (1975-2005 jyldary) úzdiksiz «Ekonomıka» kafedrasynyń meńgerýshisi boldy.
Ǵylymı qaýymdastyq arasynda Qabı Oqauly negizgi kapıtal, ónerkásip pen kásipkerliktiń damýy, ekonomıkany basqarýdyń sharýashylyqtyq mehanızmi sekildi ózekti máselelerdi tereń zertteýshi ǵalym retinde tanyldy.
Qabı Oqauly - ǵylym men bilim berý júıesine eleýli eńbek sińirgen belgili tulǵa. Ol Qazaqstan Respýblıkasy Bilim jáne ǵylym mınıstrliginiń oqý-ádistemelik birlestiginiń tuńǵysh jetekshileriniń biri, ekonomıkalyq joǵary oqý oryndarynyń stýdentterine arnalǵan iskerlik ekonomıkalyq oıyndar ádistemesiniń avtory, ony Qazaqstanda alǵashqy uıymdastyrýshy jáne qoldanysqa engizýshi, Qazaq entsıklopedııasynyń ekonomıka boıynsha redaktsııalyq keńesiniń tóraǵasy, Qazaqstan Respýblıkasynyń Ǵylymı kadrlardy attestattaý jónindegi departamentiniń ekonomıkalyq ǵylymdar boıynsha eksperttik Keńesiniń tóraǵasy boldy.
Onyń jemisti jetekshiliginiń nátıjesinde elimizge belgili memleket jáne qoǵam qaıratkerleriniń tutas shoǵyry qalyptasty, olar ulttyq ekonomıkanyń damýyna zor úles qosýda.
