Akademık K. Saǵadıev Birinshi Nazarbaev oqýlarynyń «Jańa álemdegi jańa Qazaqstan» ataýyna qarsy shyqty
ASTANA. 28 qarasha. QazAqparat - Búgin Astanada ótken «Qazaqstan Respýblıkasynyń Tuńǵysh Prezıdenti - Elbasy N. Nazarbaevtyń Qazaqstanda parlamentarızmniń qalyptasýyndaǵy róli» atty konferentsııa barysynda sóz sóılegen akademık Kenjeǵalı Saǵadıev Birinshi Nazarbaev oqýlarynyń «Jańa álemdegi jańa Qazaqstan» ataýyna qarsy pikir bildirdi.
Sóz arasynda akademık K. Saǵadıev erteń elordada «Jańa álemdegi jańa Qazaqstan» atty Birinshi Nazarbaev oqýlary ótetinin aıta kele, bunyń álemdik qaýymdastyq ókilderimen birlese otyryp, Ult Kóshbasshysynyń ózine tıisti tarıhı eńbegin pash etýdegi asa qajetti forým ekenine toqtaldy.
«Degenmen, maǵan onyń ataýy, ıaǵnı «Jańa álemdegi jańa Qazaqstan» brendi sonshalyqty unamaı tur. Tarıhtyń logıkasy men kezeńi qoǵamnyń udaıy jańǵyrýyn talap etedi. Qazaqstan óz tarıhyndaǵy kezeńderde belgili bir jańǵyrýdy bastan keshirdi, áli de keshirip keledi. Ol 20 ǵasyrda jańa tálimger bolatyn, endigi jyldary da, aldaǵy onjyldyqta da jańara bermek. Al bundaı jańara beretin dáýir yrǵaǵynda bizdiń tarıhymyzdyń kúrt ózgeristerge toly kezeńin, onyń damýyna Nazarbaev qosqan eleýli úlesterdi keleshek urpaq sonshalyqty baıqaı almaýy ǵajap emes. Ásirese, bundaı ataýdy forým saıyn qaıtalaı bersek tipti túsiniksiz bolar edi», - dedi K. Saǵadıev.
Osyǵan oraı, akademıktiń pikirinshe, jyl saıynǵy dástúrge aınalatyn Nazarbaev oqýlaryna, halyqaralyq forýmǵa jańa ataý, jańa brend kerek.
«Naqtylap aıtqanda, muny «Nazarbaev shyńdary» degen oryndy. Qazaq halqynyń jadynda erteden saqtalyp kele jatqan «Esim hannyń eski joly», «Qasym hannyń qasqa joly» bar. Al osylar sekildi «Nazarbaev shyńdary» da keleshek urpaqqa N. Nazarbaev basshylyǵyndaǵy naqty ózgeristerge toly kezeńdegi ulttyń jasampaz isterin esinde qaldyratyn edi», - dedi Kenjeǵalı Ábenuly.
