Akademık Habıbolla Ospanov atyndaǵy zal men aýdıtorııa ashyldy
ASTANA. KAZINFORM — Ál-Farabı atyndaǵy Qazaq ulttyq ýnıversıtetinde Túlekter kúnin merekeleý aıasynda kórnekti ǵalym, QR UǴA qurmetti akademıgi, hımııa ǵylymynyń doktory, professor Habıbolla Qusaıynuly Ospanovtyń qurmetine arnalǵan ataýly zal men oqý aýdıtorııasynyń saltanatty ashylý rásimi ótti. Hımııa jáne hımııalyq tehnologııa fakýltetiniń tórtinshi qabatynda ornalasqan jańa bilim berý keńistigi Túlekter kúnine oraı jáne ýnıversıtet bitirgen metsenattardyń demeýshiligimen tolyq jańartyldy.
Saltanatty shara akademık Habıbolla Ospanov atyndaǵy zaldyń ashylýymen bastalyp, onyń lentasyn QazUÝ-dyń Basqarma Tóraǵasy – Rektor Janseıit Túımebaev, Senat depýtaty Altynbek Nuhuly jáne akademık Murat Jurynov qıdy. Shara barysynda aqyn Aspanbek Shuǵataevtyń «Jyr shashý» arnaýymen súıemeldengen ǵalym bıýstiniń saltanatty túrde perdesi túrildi.
Jıynda sóz sóılegen ýnıversıtet rektory Janseıit Túımebaev professor Habıbolla Ospanovtyń ǵylymı murasy halyqaralyq deńgeıde joǵary baǵalanǵanyn jáne onyń otandyq ǵylym men joǵary bilim berý salasynyń damýyna ólsheýsiz úles qosqanyn atap ótti. Rektor óz sózinde ǵalymnyń mıneraldardyń erý kınetıkasy men sýtek energetıkasy baǵytyndaǵy zertteýleri búgingi kúni de ózektiligin saqtap otyrǵanyn, ol negizin qalaǵan ǵylymı mektep kóptegen jas ǵalymdardyń qalyptasýyna jol ashqanyn tilge tıek etti. Janseıit Qanseıituly Habıbolla Qusaıynulynyń ónegeli ómir joly men ǵylymı qyzmeti jastar úshin eńbekqorlyqtyń, adaldyqtyń jáne otanshyldyqtyń jarqyn úlgisi ekenin aıta kele, bul ataýly keńistikter tek oqý aýdıtorııasy ǵana emes, ǵylymǵa degen qurmettiń, ustazǵa taǵzymnyń jáne ǵylymı sabaqtastyqtyń sımvoly ekenin bildirdi.
Shara aıasynda ýnıversıtet basshysy Parlament Senatynyń depýtaty Altynbek Nuhulyna joǵary bilim men ǵylymdy damytýǵa qosqan úlesi úshin «Ál-Farabı altyn medalin» tabys etti.
Saltanatty shara zamanaýı úlgide jabdyqtalǵan №418 oqý aýdıtorııasynyń ashylýymen qorytyndylandy. Lenta qııý rásimine akademıktiń balalary men jaqyn týystary qatysty. Professordyń shákirtteri men jaqyndarynyń qoldaýymen júzege asyrylǵan bul ıgi bastama ǵalym murasyn Qazaqstannyń bolashaq hımıkteri úshin saqtaý maqsatyn kózdeıdi.
