Akademık Ǵ. Mutanovtyń «Ekonomıka-matematıkalyq ádister men úlgiler» kitabyn Nobel syılyǵynyń ıegeri joǵary baǵalady
ASTANA. 28 qańtar. QazAqparat - Nobel syılyǵynyń ıegeri, belgili matematık ári ekonomıst Djon Forbs Nesh ál-Farabı atyndaǵy QazUÝ rektory, akademık Ǵalym Mutanovtyń «Ekonomıka-matematıkalyq ádister men úlgiler» atty kitabyna óziniń joǵary baǵasyn berdi.
D. Nesh avtorǵa jazǵan hatynda «Cizdiń kitabyńyzǵa qatysty, men óte qatty áserlendim. Sizdiń kitabyńyz týraly pikirim óte joǵary. Búginde ekonometrııa, ásirese ekonomıster men osy sala boıynsha maman daıarlaıtyn ýnıversıtetter tarapynan joǵary baǵalanyp otyr. Jaqynda Prınstondyq professor K. Sıms Nobel syılyǵynyń ıegeri atandy. Onyń ekonometrııa salasyndaǵy jumysy jan-jaqty qoldaýǵa ıe boldy. Sizdiń kitabyńyzdan men Garold Kaýnǵa silteme kórdim. Men ony kóptegen jyldar boıy, «vengerlik ádiske» baılanysty bilýshi edim. Usynylǵan zertteý nátıjeleri maǵan zor áser etti», - dep atap ótti.
Kúrdeli áleýmettik-ekonomıkalyq úrdisterdi matematıkalyq jáne statıstıkalyq ádister men úlgiler túrinde sıpattaýdyń tıimdi ádisteriniń biri bolyp tabylatyn ekonometrııa ekonomıkalyq ǵylymdar arasynda jetekshi oryndardyń birin alady. Sheteldik mamandar men ǵalymdardyń pikirinshe Qazaqstanda ekonometrııanyń zamanaýı mektebi qalyptasqan. Bul ǵylym ekonomıkanyń túri salalarynda jan-jaqty qoldanylyp keledi jáne el Prezıdentiniń «Qazaqstan-2050» strategııasynda aıqyndalǵan ekonomıkalyq saıasattyń jańa kýrsy aıasynda erekshe suranysqa ıe bolyp otyr.
Belgili sheteldik baspalar Ǵ. Mutanovtyń monografııasyn jarııalaýǵa qyzyǵýshylyq tanytty, alaıda avtor otandyq ǵylymnyń artyqshylyǵy men basymdylyǵyn saqtaı otyryp, óz eńbegin Qazaqstanda basyp shyǵardy.
