Akademık Ábdimálik Nysanbaev dúnıeden ótti
ALMATY. QazAqparat - Belgili ǵalym, fılosofııa ǵylym doktory, professor, QR UǴA akademıgi Ábdimálik Nysanbaıuly Nysanbaev 86 jasynda dúnıeden ozdy. Bul týraly «Ǵylym ordasy» RMK Facebook paraqashasynda jazdy, dep habarlaıdy QazAqparat tilshisi
«Ábdimálik Nysanbaev 570-ten astam ǵylymı, ǵylymı-saraptamalyq, ǵylymı-ádistemelik eńbekter, sonyń ishinde 30 monografııa, jeke kitaptar men oqý quraldaryn jazǵan. Birqatar eńbekteri 25 shet tilderinde jaryq kórgen.
Ǵalymnyń týǵan-týystaryna, jaqyndaryna qaıǵyryp kóńil aıtamyz. Alla panasyna alǵaı»,- delinedi «Ǵylym ordasy» RMK ujymynyń kóńil aıtý hatynda.
Eske salaıyq, Ábdimálik Nysanbaıuly Nysanbaev 1937 jyly 1 mamyrda Qyzylorda oblysy Syrdarııa aýdany Qaraýyltóbe aýylynda dúnıege kelgen.
Ǵalym, fılosofııa ǵylymynyń doktory (1977), professor (1980) QR UǴA akademıgi (2003), Qazaqstannyń eńbek sińirgen ǵylym men tehnıka qaıratkeri (1994), Qyrǵyz Respýblıkasynyń eńbek sińirgen ǵylym qaıratkeri (1995).
1960 jyly Qorqyt Ata atyndaǵy Qyzylorda memlekettik ýnıversıtetin bitirgen. 1960-1961 jyldary KSRO ǴA-nyń Hımııa ǵylymdary ınstıtýtynda aǵa laborant, 1961-1976 jyldary Qazaqstan ǴA-nyń Fılosofııa jáne quqyq ınstıtýtynda kishi ǵylymı qyzmetker, aǵa ǵylymı qyzmetker, ǵylym fılosofııasy jáne metodologııasy bóliminiń meńgerýshisi. 1990 jyldan Fılosofııa jáne quqyq ınstıtýtynyń (qazirgi Fılosofııa jáne saıasattaný ınstıtýty) dırektory. Sonymen qatar 1997-2003 jyldary «Qazaq entsıklopedııasy» baspasynyń Bas redaktory qyzmetin qosa atqardy.
Ábdimálik Nysanbaevtyń negizgi zertteý eńbekteri dıalektıka jáne tanym teorııasy, ǵylym fılosofııasy men metodologııasy, qazaq jáne túrki fılosofııasy, áleýmettik jáne saıası fılosofııa, saıasattaný jáne mádenıettaný máselelerine arnaldy. Ol ǵylymı mektep qalyptastyryp, kóptegen ǵylym doktorlary men kandıdattaryn daıyndady.
Nysanbaev 570-ten astam ǵylymı, ǵylymı-saraptamalyq, ǵylymı-ádistemelik eńbekter, sonyń ishinde 30 monografııa, jeke kitaptar men oqý quraldaryn jazǵan. Birqatar eńbekteri 25 shet tilinde jaryq kórgen. Ǵylymdaǵy eńbegi úshin Qazaqstannyń (1984) jáne Túrkııanyń (1999) Memlekettik syılyqtaryn, QR Prezıdentiniń Beıbitshilik pen rýhanı tatýlyq syılyǵyn alǵan (1998), «Otan», «Parasat» (2004) ordenderi (1998) men birneshe medaldarmen marapattalǵan. 2005 jyly «Fılosof Nysanbaev» atty derekti fılm jaryq kórdi.
Foto: a-askar.kz
