Akademık A. Seıteshevtiń 30 tomdyǵy jaryq kórdi
ALMATY. 20 jeltoqsan. QazAqparat /Erbol Turymbetov/ - Búgin Almatydaǵy QR Ulttyq kitaphanasynda QR Ulttyq ǵylym akademııasynyń akademıgi, pedagog Ajes Seıteshevtiń 30 tomdyq tańdaýly pedagogıkalyq shyǵarmalarynyń tusaýkeseri boldy.
A. Seıteshev - kásiptik pedagogıkanyń negizin qalaýshy, KSRO Pedagogıkalyq ǵylym akademııasy, QR Ulttyq ǵylym akademııasy, RǴA-nyń qurmetti múshesi, Búkilálemdik kásiptik bilim qaýymdastyǵynyń tolyq múshesi, professor, RAO-nyń sheteldik múshesi, KSRO ǵylymyna eńbegi sińgen qaıratker, TMD-nyń «Ulttyq kadrlar daıarlaýdaǵy yqpaldastyq pen sarabdaldyq» máselesi jónindegi Úılestirý keńesiniń tóraǵasy.
«Men osy eńbegime ómirimniń 50 jylyn arnadym. Bul eńbegimdi búginde Reseı, Ýkraına, Ortalyq Azııa elderi jáne basqalar satyp alýda. Bul ǵylymı izdeniste men pedagogıkanyń ádisteri, ádisnamasy, teorııasy jáne basqa da qyrlaryn tolyq qarastyrdym. Endi osy kitaptarymdy keıingi jastar qajetine jaratsa deımin», -deıdi ǵalym.
Búginde A. Seıteshevtiń ǵylymı mektebi bar. Ol 48 ǵylym doktory men 79 ǵylym kandıdatyn daıyndap shyǵardy. 40 jyldan astam fılosofııa, áleýmettaný, tehnıka, gerontologııa jáne basqa ǵylym salalarymen aınalysyp, 48 monografııanyń, 12 oqýlyq pen 200 kitap, myńnan asa ǵylymı maqalalardyń avtory atandy.
