«Aka» men «aǵanyń» aıyrmasyn kıik qaıdan túsinsin?!» respýblıkalyq basylymdarǵa sholý

***

Keshe Qazaqstan Prezıdenti Nursultan Nazarbaev elimizge resmı saparmen kelgen Túrik Respýblıkasynyń Syrtqy ister mınıstri Ahmet Dáýitoǵlyn qabyldady. Osyǵan oraı «Egemen Qazaqstan» gazetiniń búgingi nómirinde «Tyǵyz yntymaqtastyq jalǵasady» degen taqyryppen maqala jaryq kórdi. Basylymnyń Memleket basshysynyń baspasóz qyzmetine silteme jasap habarlaýynsha, áńgime barysynda saýda-ekonomıkalyq jáne mádenı-gýmanıtarlyq salalardaǵy Qazaqstan-Túrkııa qarym-qatynastaryn damytýdyń perspektıvalary talqylanǵan. «Memleket basshysy óziniń 2009 jylǵy qazanda Túrkııaǵa resmı sapary barysynda, sondaı-aq Túrki tildes memleketterdiń sammıti aıasynda Nahchyvandaǵy joǵary deńgeıdegi ekijaqty kezdesýler kezinde qol jetkizilgen kelisimderdiń iske asyrylý barysyna qanaǵattanýshylyq sezimin bildirdi. A.Dáýitoǵly N.Á.Nazarbaevtyń basshylyǵymen Qazaqstannyń qol jetkizgen tabystaryna joǵary baǵa berdi. Mınıstr Qazaqstan men Túrkııanyń shekarasy ortaq bolmaǵanmen, eki eldi ortaq tili men tarıhı sabaqtastyǵy baılanystyratynyn atap ótti, dep jazady basylym.

Sonymen qatar osy kúni mártebeli meıman elimizdiń Premer-Mınıstri Kárim Másimovpen de kezdesip, eki el Prezıdentteri bekitken Strategııalyq seriktestik týraly shart aıasynda Qazaqstan-Túrkııa saýda-ekonomıkalyq qarym-qatynastaryn ári qaraı damytý máselelerin keńinen talqylaǵan.

«Nahchyvanda Prezıdent Nursultan Nazarbaevtyń bastamasymen qurylǵan «Túrki tildes memleketter yntymaqtastyǵynyń keńesi» hatshylyǵy Ystambulda ornalasatyn bolady.Bul týraly keshe Memleket basshysymen kezdeskennen keıin Túrkııa syrtqy ister mınıstri Ahmet Dáýitoǵly málim etti», dep jazady «Kazahstanskaıa pravda» gazeti. Basylymnyń jazýynsha, Qazaqstanda Túrik akademııasy qurylatyn bolady. Túrkııa sondaı-aq EQYU Memleket basshylarynyń sammıtin Astanada ótkizýge yqpal etý jáne barlyq halyqaralyq uıymdar aıasynda Qazaqstanmen belsendi yntymaqtastyq nıetinde.

«Egemen Qazaqstan» gazetiniń búgingi nómiriniń 3-6-shy betterinde Qazaqstan Respýblıkasy Prezıdentiniń 2010 jylǵy aqpannyń 1-indegi №922 Jarlyǵymen bekitilgen «Qazaqstan Respýblıkasynyń 2020 jylǵa deıingi Strategııalyq damý jospary» jarııalanyp otyr. arnaýly betterde kórsetilgen búkteý jáne kesý syzyqtary arqyly gazettiń tórt betinen on alty bettik kitapsha shyǵady.

Keshe Aqordada Qazaqstan Respýblıkasynyń Memlekettik hatshysy - Syrtqy ister mınıstri Qanat Saýdabaevqa Qazaqstan Respýblıkasyna jańadan Tótenshe jáne Ókiletti Elshi bolyp taǵaıyndalǵan Jańa Zelandııanyń elshisi Ien Aleksandr Hıll, Serbııanyń elshisi Elıtsa Kýrıak, Kıprdiń elshisi Petros Kestoras jáne Irlandııanyń elshisi Fılıpp Makdona Senim gramotalaryn tapsyrdy. Osy resmı sharaǵa keńinen toqtalǵan «Egemen Qazaqstan» gazeti «Kıpr Respýblıkasynyń elshisi Petros Kestorastyń atap ótýinshe, Kıpr men Qazaqstan arasynda dıplomatııalyq qatynas 1992 jyly ornady. Sodan bergi ýaqytta eki memleket túrli salalarda yntymaqtastyq ornata bildi. Elshi sondaı-aq Qazaqstan syrtqy saıasat vedomstvosynyń basshysymen kezdesýinde ekijaqty qatynastardy damytýǵa basa nazar aýdarylǵanyn aıta kelip, Qazaqstan Prezıdentiniń EQYU-nyń joǵary deńgeıdegi sammıtin ótkizý bastamasyn Kıpr basshylyǵy qoldaıtyndyǵyn málim etti», dep jazady.

***

«Esińizde bolsa, 2000 jyldary saıyn dalamyzda jortqan kıikterimiz quryp ketýge shaq qalǵan edi. Resmı málimetterge júginsek, sol kezderi 1 mıllıonnan astam kıikterdiń qarasy 21 myńǵa deıin azaıǵan», dep jazady «Alash aınasy» gazeti búgingi sanynda jaryq kórgen «Aka» men «aǵanyń» aıyrmasyn kıik qaıdan túsinsin?!» atty maqalasynda. Basylym betinde jaryq kórgen maqalada shyǵys medıtsınasynda taptyrmas dári-dármektik shıkizat retinde paıdalanylatyn atalǵan túz janýarynyń múıizine qyzyqqan ekiaıaqtylardyń atyp alatyndyǵy, ásirese qys aılarynda kórshi Ózbekstan memleketine kóshken kıikterdiń teń jartysy elge oralmaıtyndyǵy jaıynda keńinen baıandalǵan.

«Kelesi qarjylyq daǵdarysqa Qytaı sebepker bolýy múmkin be?». «Alash aınasy» gazetiniń osy saýalyna Májilis depýtaty Murat Ábenov «ıá» dep jaýap berse, L.Gýmılev atyndaǵy Eýrazııa ulttyq ýnıversıtetiniń professory, qytaıtanýshy Dúken Másimhan «joq» degen jaýabyn bergen. Basylymda jarııalanǵan jaýaptardyń qandaı sebepterge súıenip aıtylǵandyǵyn bilgińiz kelse, búgingi sanyndaǵy jarııalanǵan maqalaǵa nazar salyńyz.

Osy basylymda ekonomıka ǵylymynyń doktory, professor Sanat Qurmanǵalıevpen aradaǵy suhbat «Sheteldik sút ónimderiniń jarnamasyna aldana berýge bolmaıdy» degen taqyryppen basylǵan. Ekeýara áńgime barysynda ǵalym «Qazaqstan 2 mıllıon tonna sútti shetelden eksporttaıdy. Meniń túsinbeıtinim - ózimizde sút jetkilikti bolsa da, ózge elderden qosymsha sút satyp alyp otyrmyz. Al eger sútti shetelden alsaq, bizde sút jetispeıdi degen sóz be? Másele sanaqta. Bizde naryqqa túspeıtin súttiń qaı jaqqa ketip jatqanyn anyqtap beretin mamandar jetkilikti. Olardy tek iske tartý kerek», depti. Suhbat barysynda elimizdegi sút ónimderine qatysty túıtkildi jaıttar keńinen baıandalǵan.