«Aq jol» partııasynyń saılaýaldy sezi 20 qarashada ótedi

NUR-SULTAN. QazAqparat – Qazaqstannyń «Aq jol» demokratııalyq partııasynyń saılaýaldy sezi Nur-Sultanda 20 qarashada ótedi. Mundaı sheshim búgin «Aq jol» fılıaldarynyń tóraǵalarynyń qatysýymen ótken partııanyń Ortalyq plenýmynda qabyldandy. Búgingi otyrysty onlaın rejımde partııa tóraǵasy Azat Perýashev ótkizdi, dep habarlaıdy QazAqparat tilshisi.

«Sezdi ótkizý tártibi men ornyna qatysty «Aq jol» partııasynyń ortalyq apparatyna usynystardy ázirleýdi tapsyramyz. Aldaǵy sezdiń formaty koronavırýspen qatysty sanıtarlyq-epıdemıologııalyq jaǵdaıǵa baılanysty bolady. Fılıaldarǵa saılaýaldy baǵdarlamanyń jobalary taratylady. Óz usynystaryńyz ben eskertýlerińizdi joldaýdy ótinemiz», - dedi Azat Perýashev.

Ortalyq keńes sonymen qatar sezdiń úsh máseleden turatyn kún tártibiniń jobasyn bekitti. Olar: partııanyń aldaǵy máslıhattar men Parlament Májilisiniń saılaýyna qatysýy, partııalyq tizimdi bekitý jáne partııanyń saılaýaldy baǵdarlamasynyń jobasy.

«Partııa basshylyǵy 24/7 rejımindegi «non-stop» jumys tártibine kóshti. Sondyqtan bárińizge baılanysta bolyp, qazirgi jáne uıymdastyrýshylyq máselelerdi jedel sheshýdi júkteımin», - dedi partııalastaryna Azat Perýashev.