«Aq jol» partııasynyń ókilderi Elbasynyń eńbegine baǵa berdi
Máselen, «Aq jol» partııasynan Májiliske depýtat bolyp saılanǵan Berik Dúısenbınov Elbasynyń Prezıdenttik ókilettigin toqtatýyn kútpegen jańalyq bolǵandyǵyn aıtady.
«KSRO-nyń qırandysynan búgingi Táýelsiz, álem moıyndaǵan, terezesi teń Qazaqstanǵa deıingi joldy tek Elbasynyń atymen ǵana baılanystyramyn. Elbasymen zamandas bolǵanymdy maqtan tutamyn. Alyp memleketterdiń arasynda adasyp qalmaı, kórshilerge adal seriktes, qınalǵandarǵa qol úshin sozǵan baýyrlas, soǵysqandardy tatýlastyrǵan beıbit memleket boldyq. Óshken ulttyq qundylyqtarymyz qaıta jandy. Adam balasy jaqsylyqqa jyldam úırenemiz ǵoı. Kúni keshe ǵana elektr jaryǵy bolmaı, sabyndy qantqa aıyrbastap, bala shaǵamyzǵa kıetin kıim bolmaı qalǵan kúnderdi búgin umyttyq. Búgin, Elbasynyń sózinen keıin kóńilge bir ókinish uıalady. Eldiń tarıhynda Elbasydaı basshy qaıtalanbasy anyq», - dedi ol.
«Aq jol» partııasy OK hatshysy Arman Sqabyluly da Tuńǵysh Prezıdenttiń málimdemesin ekiudaı sezimmen qabyldaǵandyǵyn basa atap ótedi.
«Qazaqtyń Jańa jyly - Naýryz meıramy qarsańynda Tuńǵysh Prezıdentimiz Nursultan Nazarbaev óz ókilettigin toqtatatynyn málimdedi. Óz basym bul jańalyqty ekiudaı sezimmen qabyldadym. Qansha degenmen búkil otyz jyldyq eńbek ǵumyrym osy bir tulǵa qazaq memleketin basqarǵan dáýirmen tuspa-tus kelipti. 1989 jyly gazet redaktsııasynyń tabaldyryǵyn attaǵan sátten bastap jýrnalıstik jumys dál osy Nazarbaev dáýirinde ótti. Bir ret Nursultan Ábishulynan suhbat aldym. Eldegi jaǵdaı óte qıyn kezeń bolatyn. Qazirgideı daıyn suraqtar emes, kóńilim qalaǵan, kópten kókeıde júrgen saýalymdy qoıǵanyma búgin eshkim senbeıtin de shyǵar!», - dep jazady Arman Sqabyluly .
Sonymen qatar ol Nursultan Nazarbaevtyń qazaq tarıhyndaǵy qaıtalanbas tulǵa ekendigine basa nazar aýdartady.
Al «Aq jol» partııasy Almaty oblystyq fılıalynyń tóraıymy Meırash Shynasylova memleketimizdiń ósip-órkendeýi, halyqtyń ál-aýqatynyń artýy jolynda atqarǵan Elbasynyń eńbegine joǵary baǵa beredi.
«Elbasynyń qabyldaǵan sheshimine qarsy tura almaımyz. Bul kemeldengen tulǵanyn sheshimi! «Ózine ózi syn kózimen qaramaıtyn xalyq bolashaǵyna kóp úmit arta almaıdy. Biz boıymyzdaǵy ozyǵymyzdan úırenip, tozyǵymyzdan jırene bilsek qana órkenıetti memleket, eńseli el bolamyz»,- degen Elbasynyń sózi onyń bıik tulǵa ekendigin dáleldeı túsedi», - dedi M.Shynasylova.
Aıta keteıik, QR Prezıdenti Nursultan Nazarbaev Qazaqstan xalqyna úndeý joldap, óz ókilettiligin toqtatýǵa sheshim qabyldaǵanyn málimdedi.
