«Aq jol» partııasynyń músheleri baıqaýshylardy daıarlaýǵa qatysty pikir almasty
«Aq jol» partııasynyń múshelerimen pikir almasý biz úshin mańyzdy. Jaqynda Saılaýdy beıpartııalyq baıqaý ortalyǵy ashyldy. Negizi, álem elderiniń tájirıbesine súıensek, qoǵamdyq uıymdar saılaý naýqanynda baıqaýshylyq is-sharalaryna qatysatyn bolsa, bul óz kezeginde memlekettiń demokratııalyq joldaǵy damýynyń kórsetkishi. Bir aptada elimizdegi partııalardyń ókilderimen kezdesý ótkizip jatyrmyz. Bizde partııalyq emes baıqaýshylar qyzmet etedi. Al sizderde partııalyq baıqaýshylar men senimdi ókilderińiz bar. Biraq negizgi maqsat bir – ol saılaýdyń ádil ári ashyq ótýine jaǵdaı jasaý. Osy oraıda baıqaýshylar ózderiniń eleýli úlesin qosatyn bolady», - dedi Saılaýdy beıpartııalyq baıqaý ortalyǵynyń jetekshisi, Qazaqstan Azamattyq alıansynyń prezıdenti Baný Nurǵazıeva.
Óz kezeginde «Aq jol» partııasynyń múshesi, Májilis depýtaty Erlan Barlybaev partııa 10 myńǵa jýyq baıqaýshyny daıyndaýdy josparlap otyrǵanyn atap ótti.
«Olardyń qatarynda senimdi ókilder de, baıqaýshylar da qamtylady. Degenmen 20 myń adamdy daıyndaý maqsatyn belgilep otyrmyz, ıaǵnı barlyq ýchaskelerdi qamtýdy josparǵa engizdik. Sebebi bir adamǵa kúni boıy saılaý ýchaskesinde bolý qıyn bolatyny túsinikti», - dedi E. Barlybaev.
«Alda óte mańyzdy saılaý ótkizilmek. Ony barynsha ashyq ári ádil ótkizý kerek. Halyq saılaýdyń durys ótýin erekshe nazarda ustap turǵanyn baıqap júrmiz. Sondyqtan Saılaýdy beıpartııalyq baıqaý ortalyǵyndaǵy búgingi kezdesý úshin alǵys aıtamyn. Ortalyq saılaýdyń taza ótýine óziniń eleýli úlesin qosady dep bilemiz», - dedi depýtat.
Eske sala keteıik, bıyl jeltoqsan aıynyń basynda elordada Saılaýdy beıpartııalyq baıqaý ortalyǵy ashylǵan edi.
Bul ortalyq saılaý ýchaskelerin barynsha qamtý úshin álemdik standarttarǵa saı baıqaýshylardy daıyndaıdy.
