«Aq jol» partııasynan 6 adam saılaýǵa qatysýǵa nıetti

NUR-SULTAN. QazAqparat - "Aq jol" partııasynyń kezekten tys XV quryltaıynda birneshe delegat óz kandıdatýrasyn usyndy. Búginde partııa atynan 6 adam prezıdenttik saılaýǵa qatysýǵa nıetti. Quryltaı olardyń ishinen bir adamdy prezıdenttikke úmitker retinde bekitýi qajet, dep habarlaıdy QazAqparat tilshisi.

Aıta keteıik, 13 sáýirde «Aq jol» partııasy Ortalyq keńesiniń plenýmy prezıdenttik saılaýǵa úmitkerlerdi anyqtaı almady. Buǵan deıin Óskemen qalalyq máslıhatynyń depýtaty Qýat Rahymberdın, Taraz qalalyq máslıhatynyń depýtaty Asan Qoshmambetov, Atyraý oblystyq fılıalynyń ókili Serik Erýbaev jáne SKO fılıalynyń tóraǵasy Evgenıı Kıntsel óz kandıdatýralaryn joldaǵan bolatyn. Bertin kele, olarǵa QR Parlament Májilisiniń depýtaty Danııa Espaeva men Qazaqstan Qurylysshylar odaǵynyń tóraǵasy Talǵat Erǵalıev qosyldy.

Búgin barlyq úmitkerler ózderiniń beınebaıandaryn kórsetip, saılaýaldy ustanymdaryn jarııalady. Sondaı-aq, delegattardyń suraqtaryna jaýap berdi. «Aq jol» demokratııalyq partııasynyń kezekten tys XV quryltaıy ashyq jáne qupııa daýys berý arqyly bir kandıdatty anyqtaıdy. Ol adam partııanyń atynan aldaǵy prezıdenttik saılaýǵa qatysatyn bolady.