«Aq jol» partııasy saılaý laıyqty deńgeıde jáne zań talabyna sáıkes ótti dep esepteıdi

ASTANA. QazAqparat – «Aq jol» demokratııalyq partııasy saılaý qortyndysy boıynsha málimdeme jasady, dep habarlaıdy QazAqparat partııa saıtyna silteme jasap.

«Qurmetti qazaqstandyqtar! Búgin Parlament Májilisi saılaýynyń qorytyndysy jarııalandy. «Aq jol» demokratııalyq partııasy saılaý laıyqty deńgeıde jáne zań talabyna sáıkes ótti dep esepteıdi.

Bul qazirgi Qazaqstan úshin erkin, ashyq jáne ózinshe teńdessiz kampanııa boldy.

Ashyqtyq pen básekelestiktiń mundaı deńgeıi Memleket basshysynyń saıası reformalary arqasynda múmkin boldy, sonyń nátıjesinde saılaý júıesinde eleýli ózgerister jasaldy: aralas proportsıonaldy-majorıtarlyq modelge kóshý, azamattyq belsendiler men táýelsiz kandıdattardyń saıası protseske belsendi aralasýyna múmkindik berdi.

Qatysýshylarǵa saılaýaldy úgit-nasıhat jumystaryn júrgizýge de, daýys berý barysyn baqylaýǵa da jan-jaqty múmkindikter jasaldy.

Biz qyzyqty da tolyqqandy elektoraldy kezeńdi ótkizip, saılaýshylarmen myńdaǵan kezdesýler uıymdastyryp, jumysymyzdyń durystyǵy men ózektiligine kóz jetkizdik.

Qazaqstan halqy partııamyzǵa senim bildirip, jańa sapaly Májilis pen máslıhattardyń paıdasyna óz tańdaýyn jasady. «Aq jol» dempartııasyna daýys bergenderdiń barlyǵyna, ortalyqtaǵy jáne óńirlerdegi múddeles úzeńgilesterimizge, aýqymdy uıymdastyrýshylyq pen tabysty nátıjeler úshin alǵysymyzdy bildiremiz.

Halyq seniminiń jańa mandaty, jańa kúsh-qýatpen biz Parlament pen maslıhattardaǵy jumysymyzdy jandandyryp, ár qazaqstandyqtyń ómir sapasyn arttyrýǵa baǵyttalǵan saıası baǵdarlamamyzdy júzege asyrýdy jalǵastyramyz», - delingen málimdemede.