«Aq jol» partııasy Prezıdenttiń bastamalaryn qoldaıdy - Azat Perýashev
Bul týraly Demokratııalyq kúshterdiń «Qazaqstan-2050» jalpyulttyq koalıtsııasynyń otyrysynda «Aq jol» partııasynyń tóraǵasy Azat Perýashev málim etti, dep habarlaıdy QazAqparat tilshisi.
«Partııa tóraǵasy retinde jaqynda ótken saılaýda jeke óz basym basqa kandıdatqa daýys bergen edim. Alaıda kesheden bastap Qasym-Jomart Toqaev meniń de Prezıdentim. Endi keshe ulyqtaý rásiminde Memleket basshysy belgilengen ózekti maqsattardy sheshý jumysynda parlamenttik partııa retinde óz kómegimizdi jasaımyz», - dedi Azat Perýashev.
Osy oraıda depýtat saıasat fýnktsııasy kúres qana emes, sonymen qatar saıası mádenıetti ilgeriletý de ekenin atap ótti.
Budan buryn habarlanǵandaı, jalpyulttyq koalıtsııanyń otyrysynda «Nur Otan» partııasy tóraǵasynyń birinshi orynbasary Máýlen Áshimbaev Qazaqstanda joǵary bıliktiń aýysýy elimizdiń barlyq zańyna sáıkes júrgizilgenin jetkizdi.
Atap aıtqanda, búgingi otyrys barysynda Demokratııalyq kúshterdiń «Qazaqstan-2050» jalpyulttyq koalıtsııasy prezıdenttik saılaýdyń nátıjelerin qoldady.
Koalıtsııa eldegi eń úlken dıalog alańdarynyń biri. Ol Qazaqstannyń jetekshi saıası partııalarynyń, QHA-nyń, qoǵamdyq birlestikterdiń jáne úkimettik emes uıymdardyń ókilderin biriktiredi. Kezdesýge qatysýshylar Memleket basshysy Qasym-Jomart Toqaevtyń saıası tuǵyrnamasyn tolyq qoldaıtyndaryn bildirdi.
