«Aq jol» partııasy Prezıdent Joldaýynyń negizgi qaǵıdalaryn talqylady

NUR-SULTAN. QazAqparat - «Aq jol» Demokratııalyq partııasy daǵdarystan keıingi el damýynyń máselelerine arnalǵan Prezıdent Joldaýynyń negizgi qaǵıdalaryn talqylady, dep habarlaıdy QazAqparat saıası uıymnyń baspasóz qyzmetine silteme jasap.

Joldaýdy talqylaýǵa partııa tóraǵasy Azat Perýashev, Ortalyq keńes prezıdýmynyń

músheleri, Májilis depýtattary, «Aq jol» partııasynyń belsendileri qatysty. Іs-shara

óńirlerdegi partııa fılıaldarymen beınekonferentsııa rejıminde ótti.

Azat Perýashev partııa múshelerine Joldaýdyń negizgi baǵyttary men Memleket basshysynyń úkimet pen memlekettik organdardyń aldyna qoıǵan tapsyrmalary týraly habarlady.

«Memleket basshysynyń Joldaýy mańyzdy bólimderden turady jáne belgilengen baǵyttardyń árqaısysy naqty tapsyrma túrinde berildi. Joldaý reformalyq sıpatta qurylǵan» - dedi Azat Perýashev.

«Akjoldyqtar» bıznesti qoldaý jónindegi kóptegen tapsyrmalardy, zardap shekken shaǵyn jáne orta bıznes sektorlarynyń barlyq nesıeleri boıynsha paıyzdyq mólsherlemelerdi sýbsıdııalaý, agroónerkásiptik keshendi qoldaý, bıznes ahýaldy jaqsartý jáne taǵy basqa máselelerdi atap ótti. Sonymen birge, talqylaý barysynda memlekettik basqarý salasyndaǵy Prezıdent tapsyrmalaryna, Strategııalyq josparlaý agenttigin, Reformalar jónindegi Joǵary Prezıdenttik keńesti, Básekelestikti qorǵaý jáne damytý jónindegi agenttigin qurýǵa, memlekettik qyzmetkerlerdiń shtatyn qysqartý, jaýapty hatshylar ınstıtýtyn taratýǵa qoldaý bildirdi.

«Bıznes partııasynyń ókilderi retinde eldiń jańa ekonomıkalyq baǵytynyń basty qaǵıdalarynyń biri bolyp jeke kásipkerliktiń jetekshi róliniń atalǵanyn estip qýanyp qaldyq», – dep atap ótti partııanyń Qaraǵandy oblystyq fılıalynyń ókilderi.

Depýtat Berik Dúısembınov Joldaýda qoıylǵan máseleler kóp jaǵdaıda «Aq jol» partııasy kóterip kele jatqan jaıtttarmen úndes ekenin aıtyp jáne partııanyń saılaýaldy jumysyn jalǵastyrýǵa shaqyrdy. Sondaı-aq, Májilis depýtaty 2018 jyly «Aq jol» partııasynyń fraktsııasy bılik ókilderiniń qos azamattyǵy úshin qylmystyq jaýapkershilikti engizýdi týraly usynysy búgin Prezıdent tapsyrmalarynyń ishinde aıtylǵanyn da eske saldy.

Fraktsııa depýtattary olar buryn kótergen ózge de máseleler Prezıdent Joldaýynda oryn alǵanyn, mysaly, 2017 jyldan beri sheneýnikterdiń shtatyn qysqartý, ákimder saılaýy týraly tapsyrmalar partııanyń baǵdarlamalyq mindetteriniń biri ekenin eske saldy.

Talqylaýǵa qatysýshylar Prezıdent Joldaýyn qoldap, «Aq jol» QDP parlamenttik fraktsııasyna Joldaýdy iske asyrý úshin tapsyrmalardy belgiledi.