«Aq jol» partııasy kommýnaldyq saladaǵy deldal uıymdardy joıýdy usynady – Merýert Qazbekova
NUR-SULTAN. QazAqparat – «Aq jol» fraktsııasy atynan QR Premer-Mınıstri atyna depýtattyq saýal joldaǵan Májilis depýtaty Merýert Qazbekova elektr energııasy naryǵyndaǵy júıeli problemalardy atady, dep habarlaıdy QazAqparat tilshisi.
«Bizdiń depýtattyq saýalymyzǵa «Aq jol» partııasy birneshe márte atap kórsetken elektr energııasy naryǵyndaǵy júıeli problemalar sebep bolyp otyr. Bul problemalar elektr energııasyn óndirýshilerde de, energııa taratýshy da, energııamen jabdyqtaýshy da uıymdarda bar», - dedi Merýert Qazbekova Májilistiń búgingi jalpy otyrysynda.
Onyń aıtýynsha, elektr energııasyn óndirýshilerge stansalar úshin elektr energııasyna arnalǵan baǵany memlekettik retteý engizilgen. Shekti baǵa stansalar tobyna baılanysty 1 kVt/saǵat úshin 2-den 14 teńgege deıin aýytqyp otyrady. Quramynda birneshe stansa, onyń ishinde GRES-1 men GRES-2 kiretin «Samuryq-Energo» iri elektr óndirýshi sanalady. Osy kompanııa elektr energııasy jáne básekelestik týraly zańdardy buza otyryp, GRES-1 óndiretin quny 1 kVt/saǵaty 5,76 teńge bolatyn arzan elektr energııany emes GRES-2 óndiretin quny 7,31 teńgelik energııany kásipkerlerge satyp otyr.
«Buǵan qosa, memlekettik kompanııa elektr energııasyn tikeleı emes jeke deldal energııamen jabdyqtaýshy uıymdar arqyly satady. Máselen, jarııa ornalastyrylǵan aqparattarǵa sáıkes, «Qazaqstan temir joly» AQ jyl saıyn tikeleı GRES-1 men GRES-2-den emes jeke energııamen jabdyqtaýshy uıymdardan elektr energııasyn satyp alady. Al «Samuryq-Qazyna» qorynyń satyp alýlar týraly erejesi QTJ-ǵa elektr energııasyn konkýrssyz-aq qor tobyna kiretin atalǵan stansalardan tikeleı satyp alýǵa múmkindik beredi», - dedi depýtat.
Osyǵan oraı «Aq jol» fraktsııasy Úkimet atyna birneshe usynys jasady.
«Aq jol» fraktsııasy osyǵan oraı ashyqtyq pen básekelestik tetikterin engizý arqyly energetıka naryǵynyń modelin túbegeıli qaıta qaraýdy; iri ónerkásiptik kásiporyndarǵa deldaldar arqyly elektr energııasyn kóterme satyp alýǵa tyıym salýdy; Elektr energııasy men qýaty naryǵynyń qazaqstandyq operatory» AQ arqyly eń tómengi kólemdi bekitip, ashyq elektrondy saýdada elektr energııasyn satý kólemin arttyrýdy; tutynýshylar úshin elektr energııasyna arnalǵan tarıfti tómendetý maqsatynda energııa taratýshy uıymdardy irilendirý boıynsha naqty sharalardy ázirleýdi; kommýnaldyq kásiporyndardy basqarý boıynsha barlyq deldal memlekettik uıymdardy joıýdy usynady»,- dedi ol.
