«Aq jol» partııasy Konstıtýtsııalyq reformaǵa qatysty málimdeme jasady

ASTANA. KAZINFORM — Konstıtýtsııalyq reforma — bul búkil saıası júıeni tereń qaıta jańǵyrtý. Bul týraly búgin Konstıtýtsııalyq reformalar jónindegi komıssııanyń úshinshi otyrysynda Májilis depýtaty Azat Perýashev málim etti. 

Ol óziniń saıası protsesterge qatysý tájirıbesi negizinde «Aq jol» demokratııalyq partııasy Memleket basshysynyń bir palataly Parlamentke kóshý jónindegi bastamasyna nyq qoldaý bildirgenin eske saldy.

Azat Perýashevtyń aıtýynsha, eki palataly Parlament — bul federaldyq memlekettik qurylym ınstıtýty, onda Senattyń mindeti – federatsııa sýbektileriniń zańnamasyn úılestirý.

— Qazaqstan — biryńǵaı zańdary men erejeleri bar ýnıtarlyq memleket. Eldiń ártúrli óńirindegi adamdardyń ómir súrýi men memlekettik qyzmetter sapasyna birdeı kepildik berilip, qorǵalýyna umtylamyz. Bul turǵyda óńirler men olardyń turǵyndarynyń múddeleri teń dárejede saqtalýy tıis, — dedi depýtat.

Ol Memleket basshysy bul baǵytta 2022 jyly qadam jasaǵanyn aıta kele, sol kezde zańdardyń qabyldanýy Májilis quqyǵyna jatqyzyldy, al Senatqa zań jobalaryn maquldaý nemese olarǵa usynystar engizý fýnktsııasy berilgenin atap ótti.

— Sondyqtan Qasym-Jomart Kemeluly Toqaevtyń qazirgi bastamasy Konstıtýtsııanyń dáıekti evolıýtsııasynyń logıkasyn kórsetti. Sonymen qatar bul bizdiń saıası júıemizdi jáne onyń ınstıtýttaryn jetildiredi, — dep atap ótti Azat Perýashev.

Onyń sózine qaraǵanda, búginde bir palataly Parlamenttiń memlekettik bılik júıesindegi ókilettigin kúsheıtý boıynsha ońtaıly sheshimder ázirlendi.

Budan buryn habarlanǵandaı, Memlekettik keńesshi — Konstıtýtsııalyq komıssııa tóraǵasynyń orynbasary Erlan Qarın Konstıtýtsııalyq reforma jónindegi komıssııanyń birinshi otyrysynda Quryltaı depýtattaryn saılaýda qandaı tásil qoldanylatynyn naqtylady.