«Aq jol» partııasy: Búgingi nátıje — myńdaǵan azamattyń senimi
ASTANA. KAZINFORM — «Aq jol» partııasynyń tóraǵasy Danııa Espaeva saılaý nátıjesine qatysty málimdeme jasap, saılaý ashyq ári ádil ótkenin alǵa tartty.
Onyń aıtýynsha, búgin elimizdiń saıası ómirindegi tarıhı oqıǵa — alǵashqy Quryltaı saılaýy óz máresine jetti, halqymyz óz tańdaýyn jasady.
— Bul Quryltaı — Qazaqstan Respýblıkasynyń Prezıdenti Qasym-Jomart Toqaevtyń aýqymdy saıası reformalarynyń aıqyn nátıjesi, jalpyulttyq referendýmda qabyldanǵan halyqtyq Konstıtýtsııamyzdyń júzege asýynyń naqty kórinisi. Osy tarıhı ózgeristerdiń zańdy dáleli retinde ótken alǵashqy Quryltaı saılaýy ashyqtyq pen ádildik qaǵıdattaryna saı ótip, azamattarǵa óz tańdaýyn erkin jasaýǵa múmkindik berdi, — dedi «Aq jol» partııasynyń tóraǵasy.
Danııa Espaeva barlyq saıası partııalar ashyq báseke jaǵdaıynda saılaýǵa qatysyp, óz baǵdarlamalaryn saılaýshylarǵa jan-jaqty jetkizgenin aıtty. Onyń sózinshe, bul — elimizdin saıası júıesin jańǵyrtý jolyndaǵy mańyzdy qadam ári halyqtyń óz bolashaǵyn aıqyndaýǵa tikeleı qatysýynyń jańa kezeńi.
— «Aq jol» Demokratııalyq partııasy osy saılaýǵa jan-jaqty daıyndyqpen, mol tájirıbemen, myqty komandamen jáne eldiń erteńine baǵyttalǵan jańashyl ıdeıalarmen qatysty. Búgingi nátıje biz úshin jaı ǵana paıyzdyq kórsetkish emes. Onyń artynda «Aq jolǵa» senim artqan myńdaǵan azamattyń úmiti men armany, eldiń bolashaǵyna degen naqty senim tur, — dep túıindedi ol.
Buǵan deıin «Ádilet» partııasynyń tóraǵasy Aıbek Dádebaı saılaý qorytyndysy boıynsha saılaýshylarǵa úndeý jasady.
Sondaı-aq Respublica partııasy exit poll nátıjelerine qatysty pikir bildirdi.
«Aýyl» partııasynyń tóraǵasy Qaırat Aıtýǵanov saılaýdyń ashyq ári uıymdasqan túrde ótkenin atap ótti.
Jalpyulttyq sotsıal-demokratııalyq partııasynyń tóraǵasy Ashat Raqymjanov saılaýdyń alǵashqy nátıjesine pikir bildirip, halyqtyń senim mandatyna ıe bolǵandaryn aıtty.
