«Aq jol» partııasy azamattar men bıznestiń jekemenshik quqyǵyn qorǵaýdy kúsheıtýdi usyndy
ASTANA. KAZINFORM — «Aq jol» partııasy azamattar men bıznestiń jekemenshik quqyǵyn qorǵaýdy kúsheıtýdi usyndy. Bul týraly Konstıtýtsııalyq reforma jónindegi komıssııanyń birinshi otyrysynda Májilis depýtaty Azat Perýashev aıtty.
- Keshe «Aq jol» partııasy ulttyq keńesiniń plenýmy ótip, onda Qyzylordada ótken V Quryltaıdyń qorytyndylary men Prezıdent Qasym-Jomart Toqaevtyń Konstıtýtsııa boıynsha bastamalaryn talqyladyq. Osyǵan baılanysty partııa tóraǵasy retinde konstıtýtsııalyq reforma jónindegi komıssııa múshelerine «Aq jol» demokratııalyq partııasy Memleket basshysy usynǵan Konstıtýtsııanyń tujyrymdamalyq ózgeristerin qoldaıtynyn jetkizý tapsyryldy. Naqty máselelerge kelsek, ulttyq bıznes pen óndirýshilerdiń ókili retinde «Aq jol» partııasy azamattar men kásipkerlerdiń zańdy múddesin qorǵaýdyń konstıtýtsııalyq kepildikterin kúsheıtýge erekshe nazar aýdarýdy usynady, - dedi ol.
Partııa basshysy olardyń bank operatsııalary men salymdary qupııalyǵynyń buzylý jaǵdaılary alańdaýshylyq týdyratynyn aıtty.
- Bizdiń oıymyzsha, azamattar men bıznestiń qarjylyq jaǵdaıyna qatysty derbes derekterdiń jetkilikti deńgeıde qorǵalmaı otyrǵany baıqalady. Qazirgideı jappaı tsıfrlandyrý men derekterdiń taralap ketý qaýipi joǵary kezeńde buǵan jol bermegen jón. Atalǵan máseleler kásipkerlik kepildikteri men bostandyqtaryna qatysty konstıtýtsııalyq quqyq normalaryn keshendi túrde qarastyrýdy aıǵaqtaıdy. Memleket basshysynyń ótken jyldyń 8 qyrkúıegindegi Joldaýynda Bas prokýratýraǵa bıznesti qoldaýdy kúsheıtý jáne ınvestıtsııalardy qorǵaý jónindegi arnaıy komıtet qurý týraly tapsyrmasy da kezdeısoq emes. Osyǵan baılanysty «Aq jol» partııasy azamattar men bıznestiń jekemenshik quqyǵyn qorǵaýǵa baǵyttalǵan konstıtýtsııalyq kepildikterdi ulǵaıtýdyń mańyzdy elementi retinde bank qupııasyn jeke jáne iskerlik kelissózdermen kez kelgen baılanys qúraldary, onyń ishinde tsıfrlyq tehnologııalar arqyly beriletin hat almasý qupııasyn konstıtýtsııalyq qorǵaýdy kúsheıtýdi usynady, - dedi ol.
Buǵan deıin vıtse-prezıdentke qoıylatyn talaptardyń úlgisi jarııalanǵanyn jazǵan edik.