«Aq jol» gazeti materıaldarynyń 25 tomdyq jınaǵy jaryq kórdi
«Jas urpaq ata-babamyzdyń jasaǵan eńbegin, murasyn kórip ósse - sanalyq urpaq bolyp ósedi dep oılaımyn. Bizdiń ǵalym, tarıhshy, qoǵam qaıratkerlerine elimiz úshin jasap jatqan eńbegi úshin alǵys aıtamyn», - deıdi Mádenıet jáne sport mınıstriniń orynbasary Nurǵısa Dáýeshov.
Ol Mádenıet jáne sport mınıstri Aqtoty Raıymqulovanyń osy týyndynyń shyǵýyna muryndyq bolǵan mamandarǵa aıtqan alǵysyn jetkizdi.
«Alash zııalysy Ahmet Baıtursynuly «Bizdiń zamanymyz - ótken dáýirdiń perzenti, keler zamannyń – atasy» degen eken. Táýelsizdik jolynda kúresip ótken uly balalarymyz naǵyz erjúrek, danyshpan bolǵan. Eshbir el ótken tarıhy men búgingi kúnnen sabaq almaı keleshegin jasaı almas. Egemendiktiń jańa lebi men qazaq tarıhyndaǵy uly tulǵalardyń esimi jańǵyrdy. Keshegi keńestik saıasat halyq jadynan ótken tarıhymyz ben sol tarıhty jasaǵan qaıratkerderimizdi tanytýǵa jol ashpady. Osy turǵydan kelgende biz uly tulǵalarymyzdy umytýdyń az-aq aldynda qaldyq. Bizdiń bul joldan qutqaryp, óshkenimizdi jandyryp, ólgenimizdi tiriltken - táýelsizdik. Sonymen qatar, bul orynǵa qazaq baspasózin de jatqyzýǵa bolady. Ulttyq baspasóz ulttyq tarıhty tanytýǵa, eldiktiń berik irgesin nyǵaıtýǵa úlken eńbek atqardy. Ótken ǵasyrdyń bas kezinde jaryq kórgen «Aq jol» gazetiniń maqalalarynan quralǵan kóptomdyq kitaptyń tarıhı-tanymdyq turǵydan qaraǵanja shyn máninde sanaly oqyrman qaýymǵa bereri mol. Ondaǵy alash zııalylarynyń ótkir oılary kúni búginge deıin ózekti ekenin eshkim joqqa shyǵara almaıdy. Memleket jáne qoǵam qaıratkeri Názir Tóreqululynyń qazaq jáne orys tilinde jaryq kórgen tańdamaly shyǵarmalary, Azamat soǵysy órshigen 1914-1919 jyldar aralyǵynda qazaq ólkesindegi ken óndirý oryndarynda bes jyl qyzmet atqaryp, alash jurtynyń tynysh-tirshiligi, salt-dástúr, ádet-ǵurpyn hatqa túsirgen aǵylshyn ınjeneri Djon Volfordtyń úsh tilde jaryq kórgen eńbegi, Arman Ahmetovtyń «Ábilmámbet han áýleti» eńbegi keshegi keńestik saıasattyń kesirinen umyt bolǵan tarıhı tulǵalarymyzdy keńinen tanytady. Bul jolda «Aq jol» demokratııalyq partııasy, qoǵam qaıratkeri Hanbıbi Esenqaraqyzy, L.Gýmılev atyndaǵy Eýrazııa ulttyq ýnıversıteti, «Alash» zertteý ınstıtýty, «Alashorda» qoǵamdyq qory ókilderi edáýir eńbek sińirgenin atap ótýimiz kerek. Atalǵan týyndylardyń bolashaq urpaqqa bereri mol», - delingen Aqtoty Raıymqulovanyń lebizinde.
