«Aq jol» fraktsııasy depýtattary kelissóz júrgizýshilerdi ulttyq múddeni qorǵaýǵa shaqyrdy
NUR-SULTAN. QazAqparat – «Aq jol» depýtattyq fraktsııasy qazaqstandyq kelissóz júrgizýshilerdi hallyqaralyq sharttardy jasaýda ulttyq múddeni qorǵaýǵa shaqyrdy. Osy oraıda Májilis depýtaty Azat Perýashev Úkimet basshysy Asqar Mamınniń atyna tıisti saýaldy joldady, dep habarlaıdy QazAqparat tilshisi.
Onyń atap ótýinshe, memlekettik organdar syrtqy ekonomıkalyq yntymaqtastyqtaǵy qadamdar tek elimizdiń ulttyq múddesine saı bolýyna nazar aýdarýy kerek. Óıtkeni kelissóz júrgizýshilerdiń biliksizdigi saldarynan el múddesine nuqsan keledi. Bul problema kornavırýs indetiniń taralýy kezeńinde ózekti bolyp tur.
A. Perýashevtiń paıymynsha, bul baǵyttaǵy keıbir kemshilikterdi eskere otyryp, ulttyq ekonomıkalyq múddege nuqsan keltiretin kemsitýshilik qadamdar syrtqy saýdadaǵy basqa da kelisimderde bolýy múmkin.
«Osyǵan baılanysty «Aq jol» partııasynyń depýtattyq fraktsııasy Úkimetten ıntegratsııalyq birlestikterde qujattardy daıarlaý kezeńinde elimizdiń ókilderine ulttyq múddeni qatań ustanýdy tapsyrýdy suraıdy. Ásirese, indet saldarynan kásipkerler qıyn jaǵdaıǵa tap bolǵan osy kezeńde bul másele ózekti bolyp tur», - dedi depýtat.
A. Perýashevtiń sózine qaraǵanda, elimizdiń barlyq halyqaralyq ekonomıkalyq mindettemelerine shuǵyl túrde taldaý jasaý kerek. Osy oraıda DSU men EAEO ishindegi sharttarda ulttyq ekonomıkalyq múddelerdiń qorǵalýy eskerilýi kerek. Qajet bolǵanda, qujattarǵa ózgerister engizýge bastamashylyq jasalaýy qajet.
Munymen qosa depýtat jergilikti kásiporyndardy qoldaýda tıisti talaptardy qamtý kerektigin atap ótti.
