Aq jeıdeli qaharman: Aýstralııada lańkesti toqtatqan qarapaıym satýshy týraly ne belgili
ASTANA. KAZINFORM — Sıdneıde jemis satýshy ondaǵan adamdy óltirgen lańkesti zalalsyzdandyrdy. Ahmed ál-Ahmedtiń otbasy atap ótkendeı ol ómirinde eshqashan qolyna qarý ustap kórmegen, dep jazady Euronews.
Ahmed ál-Ahmed — 43 jasta, eki balanyń ákesi, shaǵyn jemis dúkeniniń ıesi. Ol qarýdy qalaı qoldanýdy bilmeıdi. Soǵan qaramastan Sıdneıdegi shabýyl kezinde qarýsyz kúıinde qarýly shabýyldaýshyny toqtatqan adam retinde jurtshylyqqa tanyldy.
Ahmed ál-Ahmedtiń erligi beınejazbaǵa túsip qalǵan. Kadrlarda aq fýtbolka kıgen er adam — dál ózi. Ol shabýyldaýshylardy art jaǵynan baıqap, bireýine júgirip baryp, vıntovkany julyp alady. Osylaısha kóptegen jazyqsyz adamnyń ómirin saqtap qalady.
BREAKING: Watch as bystander disarms active shooter at Bondi Beach in Sydney, Australia.https://t.co/ko1DIo7tMY
— AZ Intel (@AZ_Intel_) December 14, 2025
Odan keıin ál-Ahmed qarýdy shabýyldaýshyǵa baǵyttaıdy, al ol qasha jóneledi. Er adam vıntovkany aǵashqa súıep, qolyn kóterip, polıtsııaǵa óziniń shabýylǵa qatysy joq ekenin ısharamen kórsetedi. Sol sátte ekinshi lańkes Ahmedke eki ret oq atyp, aıaǵyn jáne qolyn jaraqattaıdy.
Izraıl premer-mınıstri Bınıamın Netanıahý Ahmed ál-Ahmedke alǵysyn bildirdi.
— Biz batyldyq tanytqan adamdy kórdik. Onyń musylman bolǵany anyqtaldy, men oǵan qurmet kórsetemin. Ol terrorısterdiń birin jazyqsyz evreılerdi óltirýine jol bermedi, — dedi Netanıahý.
Sondaı-aq Netanıahý Aýstralııa premer-mınıstri Entonı Albanızge eldegi júrgizilip jatqan saıasattyń «antısemıtızmdi órshitip otyrǵanyn» eskertkenin aıtty. Izraıl bıligi polıtsııa terakt dep tanyǵan shabýyldyń yqtımal uıymdastyrýshylaryna qatysty tergeý júrgizip jatyr.
Ahmed ál-Ahmed aýrýhanaǵa jetkizilip, oǵan ota jasaldy. Qazirgi tańda onyń otbasy tezirek saýyǵyp ketýine úmit artyp otyr.
Sıdneıdegi terakt saldarynan, shabýyl jasaǵandardyń birin qosa alǵanda, 12 adam qaza taýyp, 30-ǵa jýyq adam jaraqat aldy. Qara kıingen belgisiz er adamdar Bondı-bıch jaǵajaıynda Hanýka merekesin atap ótip jatqan jergilikti evreı qaýymdastyǵyna oq jaýdyrǵan.
Budan buryn Germanııa, EO jáne Túrkııa Aýstralııadaǵy terrorıstik shabýyldy aıyptady.