Aq Jaıyqta «Qyz Jibek pen Tólegen» aqboz at mindi (FOTO)
ORAL. QazAqparat - Áıgili «Qyz Jibek» fılminde basty keıipkerlerdi somdaǵan Qazaqstannyń halyq ártisi Quman Tastanbekov pen Qazaqstannyń eńbek sińirgen ártisi, «Qurmet» ordeniniń ıegeri Merýert Ótekesheva Aq Jaıyq óńirine kelip, jurtshylyqpen kezdesý ótkizdi.
Jyly shyraıly júzdesý Merýert Ótekeshevanyń týǵan jeri Jánibek aýdanynda da uıymdastyryldy. Onda ataqty óner qaıratkerleri bıyl túsirilgenine 45 jyl tolǵan «Qyz Jibek» fılminiń shyǵý tarıhy týraly syr shertti. Keńes dáýirinde mundaı týyndynyń jaryq kórýine kedergiler az bolǵan joq. Qazaq eliniń sol kezdegi basshysy Dinmuhamed Qonaevtyń qoldaýymen, memleket jáne qoǵam qaıratkeri Іlııas Omarov, kompozıtor Nurǵısa Tilendıevteı belgili tulǵalardyń usynysymen qolǵa alynǵan fılmniń oıdaǵydaı shyǵýy úshin rejısseri Sultan Qojyqov, sýretshisi Gúlfaırýz Ysmaıylovamen birge barlyq ártister tabandy eńbek etti. M.Ótekeshevanyń eske alǵanyndaı, sol kezde onynshy synypty jańa ǵana bitirgen jas aktrısa Farıda Sháripova, Ydyrys Noǵaıbaev, Ánýarbek Moldabekov, Asanáli Áshimov syndy áriptesterinen kóp nárse úırendi.
Kezdesý barysynda Quman Tastanbekov Aq Jaıyq eline rızashylyǵyn bildirip, máńgilik mahabbat aıǵaǵyndaı Muhtar Shahanovtyń «Mahabbat jyry» men kompozıtor Serafım Týlıkovtyń «Prıshla lıýbov» ánderin oryndap berdi.
Aýdan ákimi Naýryzbaı Qaraǵoıshın mártebeli meımandarǵa alǵyshat tabys etip, ıyqtaryna shapan jabýmen birge aqboz at mingizdi. Sharaǵa qatysqan oblystyq mádenıet, muraǵattar jáne qujattama basqarmasynyń basshysy Dáýletkereı Qusaıynov aýdan turǵyndarynyń Merýert Qarataıqyzyndaı jerlesimen oryndy maqtanatynyn atap ótti.
Aıta keteıik, sapar barysynda óner qaıratkerlerin oblys ákimi Altaı Kólginov qabyldap, qurmet kórsetti. Óńir basshysy «Qyz Jibek» fılminiń túsirilý tarıhy týraly derekti týyndy da kerektigin aıtyp, ony qoldaýǵa daıyn ekendigin bildirdi. Sonymen qatar Qadyr Myrza Áli atyndaǵy mádenıet jáne óner ortalyǵynda ótken keshte Qyz Jibek pen Tólegenge Oralda eskertkish ornatý týraly usynys ortaǵa salyndy. Buǵan baılanysty Quman Tastanbekov Tarazdaǵy saıabaq pen Qyzylorda oblysy Aral qalasyndaǵy mádenıet úıiniń aldynda osyndaı eskertkishter bar ekendigin aıtyp, jastar jıi baratyn mundaı qasterli oryn Jaıyqta bolsa, artyq etpeıtindigin jetkizdi.
