Aq Jaıyqta Abaı kúni toılanyp, óleńderi oqyldy
Mereke Oraldaǵy Abaı alańyndaǵy aqyn eskertkishine gúl shoqtaryn qoıýmen bastaldy.
Oǵan qatysqan oblys ákimi Ǵalı Esqalıevtiń atap ótkenindeı, Memleket basshysynyń tapsyrmasyna sáıkes bıyl Abaı kúni elimizde alǵash ret mereke retinde toılanyp otyr. Shynynda da Abaıdyń murasy halqymen birge jasaı bermek. Uly aqynnyń sol kezde jazǵan óleńderi men qara sózderiniń ómirsheńdigi sondaı, qazirgi zamandaǵy hal-ahýaldy tap basyp kórsetedi. Abaı armandaǵan «tolyq adam» bolsa ǵana qazaq muratyna jetpek. Danyshpannyń ósıet sózderin umytpaı, odan taǵylym ala bilý keıingilerge paryz bolyp qala bermek.
«Abaı kúni barshaǵa ortaq ulttyq mereke bolýy tıis. Táýelsizdik alǵan kezden bastap Abaı kúnin belgilep, osynshama ýaqyt boıy uly aqyndy oqytý kerek edi. Sonda urpaq tez eseıer edi, aldyńǵy qatarly elder qataryna tez qosylýǵa talap qylar edi. Degenmen áli de kesh emes. Bul meıram – uly Abaıdyń esimi ár júrekke jazylatyn kún. Aqyn jyrlaryn tebirene oqyp, ánderin áýelete salatyn kún. Abaı dúnıege kelgen osy kúndi qasterleı bilsek, eldigimiz de bıiktep, óremiz de ósedi», - dedi zııaly qaýym atynan sóz alǵan aqyn, Memlekettik syılyqtyń laýreaty Aqushtap Baqtygereeva.
Bıyl qaıta jańartylǵan aqyn alańynda Abaıdyń qara sózderi jazylǵan tastar ornatylǵan. Sonyń birindegi: «...Yqylaspen oqyp, uǵyp alyńyzdar. Kúlli adamzat balasyn qor qylatyn úsh nárse bar. Sonan qashpaq kerek: áýeli – nadandyq, ekinshisi – erinshektik, úshinshi – zalymdyq dep bilesiń...» degen Abaı sózderi halqyn máńgi saqtandyryp turǵandaı.
Shara barysynda aqynnyń óleńderi oqylyp, ánderi oryndalyp, «Abaı oqýlary» onlaın baıqaýynyń jeńimpaz-júldegerleri marapattaldy.
Sýretterdi túsirgen Rafhat Halelov
