Aq Jaıyq jurtshylyǵy belgili tarıhshy-ǵalymdy eske aldy
ORAL. QazAqparat - Qadyr Myrza Álı atyndaǵy mádenıet jáne óner ortalyǵynda belgili ǵalym, tarıh ǵylymdarynyń doktory, professor, QR bilim berý isiniń úzdigi, Bókeı ordasy aýdanynyń «Qurmetti azamaty» Baqtyǵul Birimjarovty eske alýǵa arnalǵan «Tarıhtyń tereńinen marjan súzgen...» atty ǵıbratty kesh ótti, dep habarlaıdy «QazAqparat» tilshisi.
Onda tarıh ǵylymdarynyń doktory, akademık Tuıaqbaı Rysbekov Baqtyǵul Birimjarovpen QazMÝ-dyń tarıh fakýltetinde qatarlas bilim alyp, sodan keıin Oral pedagogıkalyq ınstıtýtynda (qazirgi M.Ótemisov atyndaǵy Batys Qazaqstan memlekettik ýnıversıtetinde) uzaq jyl birge qyzmet etkenin aıtyp, onyń ǵalymdyq kelbetine, ónerpazdyǵyna jáne adamgershilik qyrlaryna toqtaldy.
«Joldastary úshin baryn bólip berýge daıar úlken júrekti, jany jaısań azamat edi. Ǵalymdyǵyna qosa dombyra shertetin óneri de bar-tyn. Ol ǵylymmen tereń aınalysyp qana qoımaı, kóptegen shákirt tárbıeleı bildi. Solardyń ishinde Alfııa Baıbolsynova men Esqaırat Haıdarov tarıh ǵylymdarynyń kandıdaty atanyp, ustazynyń úmitin aqtady. Zaıyby Sáýleniń erte dúnıe salýy ǵalymǵa ońaı tıgen joq. Ómiriniń sońǵy jyldary aýyryp, kózi de kórmeı qaldy. Nebári 62 jasynda dúnıeden ótken asyl azamattyń esimin biz umytpaımyz», dedi T.Rysbekov.
Sol sekildi Bókeı ordasy aýdanyndaǵy M.Mámetova atyndaǵy Saıqyn orta mektebinde birge oqyǵan Nurlybek Birmanov, QazMÝ-da bir topta bilim alǵan atyraýlyq tarıhshy-ǵalym Jeńisbek Mustafın, dombyrashy, Qazaqstannyń eńbek sińirgen mádenıet qyzmetkeri Ermek Qazıev, Bókeı ordasy aýdandyq máslıhatynyń hatshysy Erbolat Tańatov jáne basqalar jyly lebizderin bildirip, estelikterimen bólisti.
1947 jyly 1 maýsymda Bókeı ordasy aýdany Saıqyn aýylynda dúnıege kelgen Baqtyǵul Qabdyruly tiri bolsa, 70 jasqa tolar edi. Osydan jarty ǵasyr buryn, 1966-1967 jyldary Saıqyn orta mektebinde muǵalim bolyp úlgergen Baqtyǵul Birimjarov 1972 jyldan ınstıtýt pen ýnıversıtette oqytýshy ǵana emes, tarıh fakýltetiniń dekany, kafedra meńgerýshisi syndy jaýapty qyzmetterdi de abyroımen atqardy. 1997 jyly týra elý jasynda doktorlyq dıssertatsııasyn qorǵaǵan ǵalym sońynda jarqyn iz qaldyrdy.
«Biregeı tarıhshy-ǵalym Baqtyǵul Birimjarovtyń esimin máńgi este qaldyrý sharalaryn oılastyrǵan abzal. Oral qalasy men Bókeı ordasy aýdanynda kóshe men mektepke atyn berse, artyq emes. Sondaı-aq ózi eńbek etken M.Ótemisov atyndaǵy ýnıversıtette dárishana ashý qajet», -dedi eńbek ardageri, M.Yqsanov atyndaǵy qordyń tóraǵasy Asqar Ataev.
Shara barysynda ǵalymnyń kózi tirisinde shyǵyp úlgermegen «Bókeı ordasy» monografııasy men «Perzent paryzy» atty kitabynyń jańartylǵan nusqasynyń tanystyrylymy boldy. Ásel Baqtyǵulqyzy keshti uıymdastyrýshylarǵa alǵysyn bildirip, atalmysh kitaptyń alǵashqy danalaryn Bókeı ordasy aýdany ákimdigi men tarıhı-mýzeı keshenine syıǵa tartty.
