Aq Jaıyq jurtshylyǵy 1 mamyr merekesin keń kólemde atap ótti
ORAL. QazAqparat - Búgin Batys Qazaqstan oblysynda Qazaqstan halqy birligi merekesi keń kólemde toılandy, dep habarlaıdy «QazAqparat» tilshisi.
Oral qalasynda birlik meıramy alǵash ret jańa alańda uıymdastyrylyp, sherýge mekeme-uıymdar, kásiporyndar, Qazaqstan halqy BQO assambleıasy, úkimettik emes uıymdar, jurtshylyq ókilderi, stýdent jastar kóptep qatysty.
Oblys ákimi Altaı Kólginov quttyqtaý sózinde Elbasy Nursultan Nazarbaevtyń sarabdal saıasatymen barsha ult ókilderiniń bereke-birliginiń arqasynda elimizdiń qaryshtap alǵa basyp kele jatqanyn jetkizdi. Prezıdenttiń QHA HHV sessııasynda atap ótkenindeı, Qazaqstan birtutas ultqa aınalsa ǵana básekege qabiletti bolmaq. Bıyl Astanada ótetin EKSPO-2017 halyqaralyq kórmesinde kúlli álemniń jańalyǵy pash etiletin bolady. Sondyqtan aldyńǵy qatarly elderge teńelý úshin saıası, ekonomıkalyq jáne rýhanı jańǵyrý qajet-aq.
Oblys ortalyǵy Oral qalasynyń órkendep, qanat jaıyp kele jatqanyna osy jańa alań da dálel bola alady. Táýelsizdiktiń 25 jyldyǵyna oraı ashylǵan alań mańynda Qadyr Myrza Álı atyndaǵy mádenıet jáne óner ortalyǵy, oqýshylar jáne jastar saraıy, Saltanat saraıy, Dostyq úıi, Nazarbaev zııatkerlik mektebi, tennıs kesheni syndy sándi de eńseli ǵımarattar ornalasqan. Shaharda jańa úıler de kóptep salynýda. Osynyń bári - tynyshtyq pen kelisimniń, yrys pen yntymaqtyń arqasy.
Aq Jaıyqtaǵy Qazaqstan halqynyń birligi merekesin kórshiles Saratov oblysynyń delegatsııasy da tamashalap, osy óńir gýbernatorynyń mindetin atqarýshy Valerıı Radaevtyń atynan Saratov oblysy úkimeti tóraǵasynyń orynbasary Aleksandr Solovev meırammen quttyqtap, ıgi tilegin bildirdi.
Oblys ártisteri men shyǵarmashylyq ujymdary merekege arnap kontsert qoıdy. Osyndaı sharalar óńirdiń barlyq aýdandarynda ótkizilip, mereke túrli qyzyqqa toly boldy.
