Aq Jaıyq jastary Elbasymen birge ekendikterin fleshmobpen beıneledi
Belsendi jastar, qoǵamdyq birlestikter músheleri, joǵary jáne arnaýly oqý oryndarynyń stýdentteri elimizdiń kók baıraǵyn kóterip, júrek sulbasyn beıneledi.
Osylaısha olar Elbasyna degen júrekten shyqqan shynaıy yqylas-peıilderin kórsetti.
«Jas Otan» jastar qanaty BQO fılıalynyń tóraǵasy Nurǵalı Joldasqalıevtiń aıtýynsha, sharaǵa 200-ge jýyq jastar qatysty.
«Osy shara arqyly oblys jastarynyń Elbasy Nursultan Nazarbaevqa degen sheksiz alǵysy men zor iltıpatyn bildirip, Ult kóshbasshysynyń tarıhı mańyzdy sheshimine qoldaý tanytýdy maqsat ettik. Kóp ult ókilderi mekendegen Qazaq elin otyz jyl boıy basqaryp, básekege qabiletti, kúlli álem tanyǵan memleketke aınaldyrǵan, sonymen qatar jetkinshek urpaqtyń alańsyz bilim alyp, beıbit aspan astynda baqytty ǵumyr keshýin qamtamasyz etken Elbasyna Aq Jaıyq jastary atynan alǵysymyzdy bildiremiz», dedi Nurǵalı Joldasqalıev.
«Elbasy bizge úlken senim artty, sol úmitti aqtaýǵa tıispiz», dedi «Jas Otan» jastar qanaty BQO fılıalynyń menedjeri Azamat Maǵzum.
«Nursultan Ábishulyna eń aldymen táýelsizdigimiz úshin rahmet aıtamyz. Biz kóp ultty memleketpiz. Turaqtylyq, kelisim men beıbitshilik saltanat qurǵan elimiz senimmen alǵa basyp keledi. Elbasymyz jastarǵa jol ashty. Osynyń bári úshin alǵys aıtamyz», dedi Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń stýdenti Ásemgúl Kenjeǵalıeva.
Jastar sharany «Rahmet sizge, Elbasy!» degen sózben túıindedi.
