"Aq jaýyn" orkestri Astanadaǵy EQYU Sammıtiniń qonaqtaryna arnap kontsert berdi
ASTANA. 30 qarasha. QazAqparat /Jasulan Amanbaıuly/ - Keshe elordadaǵy Prezıdenttik mádenıet ortalyǵynda Qazaqstan Jastar odaǵy syılyǵynyń laýreaty, «Shabyt» halyqaralyq shyǵarmashyl jastar festıvaliniń birinshi dárejeli jeńimpazy «Aq jaýyn» memlekettik kameralyq orkestriniń kontserti ótti.
EQYU Sammıtine qatysýshy sheteldik delegattarǵa arnap, Mádenıet mınıstrliginiń mádenı baǵdarlamalary daıyndalǵan. «Aq jaýyn» memlekettik kameralyq orkestriniń kontserti kelgen qonaqtardyń qurmetine usynylyp otyr.
«Bizdiń baǵdarlama Astana qonaqtaryna arnaıy jasaqtaldy. Barlyq jaǵynan qamtyp, ádeıilep qobyzdan bastap, dombyraǵa deıingi dıapazonymyzdy kórseteıik dedik. Onyń ishinde sazsyrnaı, sybyzǵy, jetigen, shańqobyz, qylqobyz, symqobyz, dombyra aspaptary bar. Sonymen qatar Ogınskııdiń «Polonez» mýzykasy ulttyq aspaptarda oryndaldy», - deıdi Orkestrdiń kórkemdik jetekshisi - QR eńbek sińirgen ártisi, kúıshi-sazger Seken Turysbek.
Kontsert baǵdarlamasy boıynsha, shetel qonaqtary aldynda jetigen, qylqobyz, shańqobyz aspaptarynda qazaq kúıleriniń popýrrıi, Yqylastyń, Dınanyń, Nurǵısa Tilendıevtiń, Táttimbettiń, Ketbuǵanyń, Qurmanǵazynyń tańdaýly kúıleri, sonymen qatar sybyzǵy kúıi «Alystaǵy arman», sazsyrnaıda Seıdolla Báıterekovtiń «Kishkentaı» atty týyndysy oınaldy. Sahnada orkestrdiń súıemeldeýimen S. Turysbekovtiń «Qońyr jel», «Qońyr qaz» ánderi respýblıkalyq konkýrstyń laýreaty Gúlmıra Sarınanyń oryndaýynda shyrqaldy.
Kontserttiń shyrqaý sheginde dáýlesker kúıshi Seken Turysbekov sahnaǵa shyǵyp, óziniń «Daraboz», «Kóńil tolqyny» shyǵarmalaryn oryndap, aspaptarynyń qońyr únine elitip otyrǵan qaýymdy birjolata serpiltip tastady.
