Aq úıge jaqyn mańda atys boldy
ASTANA. KAZINFORM — Aq úıden bir mıl qashyqtyqta bolǵan atystyń egjeı-tegjeıi belgili boldy. NBC News arnasynyń habarlaýynsha, bir adamnyń ómirin qıyp, taǵy tórt adam jaralanǵan atysqa uzaq ýaqytqa sozylǵan qarjylyq daý sebepshi bolǵan, dep habarlaıdy Kazinform agenttiginiń menshikti tilshisi.
Kúdikti retinde 55 jastaǵy doktor Mett Lambert atalyp otyr. Polıtsııa onyń denesin jeti qabatty elıtalyq «Metropole» turǵyn úı kesheniniń jetinshi qabatyndaǵy páterinen tapty. Ol ózin ózi atyp qoıǵan degen boljam aıtylyp otyr.
Lambert buǵan deıin tańǵy saǵat 8:30-da Vida fıtnes ortalyǵyna onyń 46 jastaǵy basqarýshysy Djeıms Stıýartty atý úshin kelgen. Sportzalǵa kelgen basqa eshkimge tıispegen. Sodan keıin Lambert úıine oralyp, ishke qamalyp alǵan. Habarlarǵa qaraǵanda, kúdikti birinshi qabattaǵy adamdarǵa óz páteriniń balkonynan oq jaýdyryp, dálizge de oq atqan, artynsha ózin-ózi atyp óltirgen. Jaralanǵan tórt adamnyń bireýiniń jaǵdaıy aýyr, qalǵan úsh adamnyń ómirine qaýip tónip turǵan joq.
Dáriger Lambert, Metropole kondomınıým qaýymdastyǵy jáne EJF Real Estate Services Inc. basqarýshy kompanııasy arasyndaǵy páterden sý aǵyp ketýine baılanysty týyndaǵan daý, uzaqqa sozylǵan janjalǵa ulasqan. Lambert páter 2024 jyly ǵımarattyń qasbetin jóndeý kezinde zaqymdalǵanyn jáne mamandardyń tekserýi máseleni sheshe almaǵanyn málimdegen.
Lambert zalaldy óteýdi jáne páterdi jóndeý qunyn tóleýdi talap etti. Óıtkeni bul oǵan 300 000 dollardan astam shyǵyn ákelgen. Іstegi negizgi kýáger marqum Stıýart edi. 2025 jyldyń jeltoqsanynda Metropole qaýymdastyǵy ylǵaldyń kóp bolýyna Vida fıtnes ortalyǵyn basqaratyn Urban Adventures kompanııasyn kinálap, qarsy shaǵym túsirgen.
Polıtsııanyń málimetinshe, Lamberttiń páterinen tirkelmegen úsh qarý: tapansha, myltyq jáne ańshy myltyǵy tabyldy. Tergeý júrip jatyr.
Buǵan deıin Vashıngtondaǵy Kapıtolıı ǵımaratynyń mańynda bolǵan tóbeles kezinde Ulttyq gvardııa sarbazyna oq atylǵany jaıly habarlaǵan edik.