Aq úıdiń kadr jónindegi dırektory Serhıo Gor Ózbekstanda dúnıege kelgen — OCCRP

ASTANA. Kazinform — Aq úıdiń kadr jónindegi dırektory 38 jastaǵy Serhıo Gor Ózbekstanda týǵany anyqtaldy. Bul týraly Times of Malta jáne OCCRP habarlady. 

Gor óziniń qaı jerde týǵanyn aıtpaǵan. The Washington Post gazetinde sheneýnik týraly maqalada onyń maltalyq ımmıgrant ekeni aıtylǵan. New York Post gazeti de maýsym aıyndaǵy maqalasynda Donald Tramp ákimshiligi sheneýniginiń maltalyq ekenin habarlady. Sondaı-aq, Gor qupııa aqparatty alý kezinde ómirbaıandyq qujattardy usynbaǵany atap ótildi.

Sheneýnik «tek Reseıde emes» dep óziniń týǵan jerin gazetke aıtýdan bas tartty. The Dispatch basylymyna Gordyń tanystary bergen aqparatqa sáıkes, ol KSRO-da týǵan. Biraq osy ýaqytqa deıin muny dáleldeıtin basqa qujat bolmady.

Times of Malta jáne OCCRP Aq úıdiń kadr jónindegi dırektory Serhıo Gorochovskıı 1986 jyly 30 qarashada Tashkentte dúnıege kelgenin anyqtady. Bul týraly aqparat Gordyń Maltadaǵy jyljymaıtyn múlkine qatysty qujattarda bar — bul qujattardy jýrnalıster alǵan. Sheneýniktiń advokaty Robert Garson da qorǵaýyndaǵy azamattyń Tashkentte týǵanyn rastady.

Tergeý derekterine sáıkes, Gor bala kezinde Maltada kem degende 5 jyl turǵan. Atap aıtqanda, 1996 jyldan 1999 jylǵa deıin ol Vıttorıozadaǵy uldarǵa arnalǵan katolık mektebinde oqydy. Keıinirek (naqty qashan ekeni belgisiz) Gordyń otbasy Amerıka Qurama Shtattaryna qonys aýdaryp, ol eldiń azamattyǵyn aldy.

Jýrnalısterdiń aıtýynsha, Gor Tramp ákimshiligindegi jumysty bastamas buryn Reseıge eki ret kelgen. 2017 jyly Vashıngtonnan Máskeýge ushyp, Reseı astanasynda bir kún bolyp, kelesi kúni Rımge ushqan. 2018 jyly respýblıkashyl senator Rend Polmen birge jumys istegen Gor Máskeýge amerıkandyq lıbertarıandyq taldaý ortalyǵy Katon ınstıtýty qarjylandyratyn shara aıasynda bardy. Bul sapar «Reseı men AQSh-qa qatysty máselelerdi zertteýge, talqylaýǵa jáne taldaýǵa arnalǵan faktilerdi anyqtaý sapary» dep ataldy.
Gordyń advokaty Máskeýge saparyn onyń sheneýnik — «naǵyz saıahatshy» ekenimen túsindirdi. Ol Gordyń 2017 jyly Reseı astanasyna saparyn «tranzıttik reıs» dep atady.

Axios basylymy Serhıo Gordy Tramptyń Aq úıdegi eń yqpaldy keńesshileriniń biri retinde sıpattady. Gor Tramptyń ulymen birge Winning Team Publishing kompanııasyn qurdy. 2020 jyly Gor Tramptyń saılaý naýqany úshin qarajat jınaýǵa jaýapty boldy, al 2024 jyly ol AQSh-tyń qazirgi prezıdentiniń naýqanyna shamamen 72 mıllıon dollar jumsaǵan saıası áreket jónindegi komıtet qurdy. Aq úıde qyzmetke kiriskennen keıin Gor Tramp ákimshiligi qyzmetkerleriniń adaldyǵyn tekserdi.

Eske sala keteıik, Tramp pen Mask arasyndaǵy saıası janjal qaıta ýshyqqany jaıly jazǵan edik.