Aq úıdiń baspasóz hatshysy bes kúnnen keıin qyzmetinen ketti
ASTANA. KAZINFORM — Ketı Zaharııa Aq úıdiń baspasóz hatshysy qyzmetine taǵaıyndalǵannan keıin bir aptadan az ýaqyt ishinde jumysynan ketti, dep habarlaıdy Kazinform agenttiginiń Vashıngtondaǵy tilshisi The New York Times basylymyna silteme jasap.
Amerıkalyq basylymnyń habarlaýynsha, buǵan onyń alǵashqy baspasóz máslıhaty jáne zańgerlik biliktiligine qatysty suraqtar sebep bolǵan.
Baspasóz máslıhaty kezinde Zaharııa tartynshaqtap, úsh suraqtan keıin baspasózben kezdesýdi aıaqtady. Keıinirek ol BAQ-qa ózin advokat retinde kórsetkenine qaramastan, advokattyq emtıhannan qulaǵany belgili boldy.
- Ashyǵyn aıtqanda, men sizdiń ornyńyzda bolsam, qaıta qarastyrar edim. Ketı, sizge bul kerek pe? Men sizge bul qajet emes dep oılaımyn, - dedi Donald Tramp tilshilerge baspasóz hatshysymen bolǵan áńgimesin aıtyp bere otyryp.
Ol Zaharııa óziniń komandasynda basqa laýazymda jumys isteýi múmkin ekenin atap ótti.
Prezıdent oǵan bul laýazymdy ótken jumada usynǵan. Aq úı qyzmetkerleriniń kópshiligine belgisiz Fox News kommentatorynyń tańdalýy kútpegen jaǵdaı boldy. Degenmen Zaharııa prezıdentpen jıi birge júretin kómekshisi Natalı Harptyń qoldaýyna ıe boldy.
The New York Times onyń úsh derekkózi áli resmı túrde jarııalanbaǵan sheshim týraly anonımdik sharttarmen aıtýǵa keliskenin atap ótti.
Ketı Zaharııa qyzmetine kiriskennen keıin alǵash ret jýrnalıster aldyna shyqqqanyn jazǵan bolatynbyz. Ol AQSh prezıdenti Donald Trampqa senim bildirgeni úshin alǵys aıtyp, onyń komandasynda jumys isteýdi burynnan armandaǵanyn jetkizgen edi.
