Aq úıdiń baspasóz qyzmetin 28 jastaǵy Hoýp Hıks basqarady
ASTANA. QazAqparat - AQSh prezıdenti Donald Tramptyń baspasóz qyzmeti Aq úıdiń kommýnıkatsııalar boıynsha dırektorynyń ýaqytsha mindetin atqarýshy bolyp Hoýp Hıks taǵaıyndalǵany týraly habarlady, deıdi TASS.
AQSh prezıdenti Donald Tramptyń baspasóz qyzmeti sársenbi kúni Aq úıdiń kommýnıkatsııa qyzmeti dırektorynyń ýaqytsha mindetin atqarýshy bolyp Hoýp Hıks taǵaıyndalǵanyn rastady.
«Hoýp Hıks Aq úıdiń baspasóz hatshysy Sara Sanderspen jáne áleýmetpen baılanys komandasymen jumys isteıtin bolady, sonymen qatar, Aq úıdiń kommýnıkatsııa boıynsha dırektorynyń ýaqytsha mindetin atqarady»,-delingen habarlamada.
«Tıisti ýaqytynda» basshylyq qyzmetke turaqty keletin adam týraly jarııalanady. Buǵan deıin atalǵan mindetti Entonı Skaramýchchı atqarǵan bolatyn. The Washington Post gazeti 28 jastaǵy Hoýp Hıkstiń áleýmetpen baılanys salasyndaǵy ókilettikteri keńeıetindigin jazǵan edi. Qazirgi ýaqytta ol Aq úıdiń strategııalyq kommýnıkatsııa boıynsha dırektory qyzmetin atqarýda. 2015 jyly, prezıdenttik laýazym úshin báseke endi bastalǵan tusta ol Tramptyń baspasóz hatshysy bolǵan.
Bul qyzmetke Skaramýchchıdiń taǵaıyndalǵany týraly habar 21 shildede belgili boldy. Osydan keıin ol Tramptyń aınalasyndaǵy sheneýnikterdi qupııa aqparatty taratty dep aıyptaǵan bolatyn. Olardyń arasynda Aq úıdiń burynǵy apparat basshysy Raıns Prıbas ta boldy. Prıbastyń ornyna buryn ulttyq qaýipsizdik mınıstrligin basqarǵan Djon Kellı keldi. Skaramýchchı taǵaıyndalǵanyna 10-aq kún ótkennen keıin otstavkaǵa ketti.
Aq úı apparatynyń kommýnıkatsııa jónindegi dırektory Amerıka prezıdenti ákimshiliginiń barlyq aqparattyq -nasıhattyq saıasatyna jetekshilik etedi.
