Aq úıde ótip jatqan qaıyrymdylyq dastarhanyna Nurlan ımam da qatysýda
VAShINGTON. KAZINFORM - Búgin AQSh prezıdenti Djo Baıdenniń qatysýymen Aq úıde qaıyrymdylyq asy ótip jatyr. Halyqaralyq sharaǵa Qazaqstannan dintanýshy, teolog, psıholog Nurlan qajy Baıjigituly qatysýda.
Sonymen qatar alqaly jıynǵa alpaýyt eldiń din basshylary, ózge de memleket jetekshileri, tanymal tulǵalar shaqyrylǵan.
"Negizgi maqsaty - álemdegi tynyshtyq, yntymaq, birlik jáne osy tóńirekte jasalatyn duǵalar men minájat. Ár din ókili óziniń duǵasyn óz qolymen, nıetimen jetkizedi. Bul - álemde bolyp jatqan jaǵdaıǵa baılanysty barlyq din ókilderiniń bir jerde nıet toǵystyrýy" - dep túsindirdi AQSh-taǵy as týraly agenttiktiń derekkózi.
Belgili bolǵandaı, qaıyrymdylyq dastarhanyna 127 memleketten 1600 adam jınalǵan.
Aıta keteıik, buǵan deıin Nurlan ımamnyń AQSh prezıdenti Djo Baıdennen shaqyrtý alyp, jolǵa attanǵaly otyrǵanyn jazǵan bolatynbyz. Ol Amerıka kóshbasshysy jyl saıyn qaıyrymdylyq as beretinin aıtqan. Jıynǵa álem memleketteriniń betke ustar azamattary shaqyrylady.
«Allanyń qalaýy boıynsha bıyl bizdiń elimizden tańdaý maǵan túsip tur eken. Memleketimizdiń múddesin, Prezıdentimiz qalyptastyryp otyrǵan ishki jáne syrtqy saıasatty, sondaı-aq rýhanııatymyzdy keńeıtý, pash etý, qazaq tarıhynyń keń ekenin kórsetý úshin osy saparǵa nıet bildirip otyrmyz. Aldaǵy aptada úlken saparǵa jol júrmekpiz», degen edi Nurlan ımam.
